Osaka a hnungtawlh zel

A inkhelh hnuhnungah result ṭha a nei thei lo a, chhan hrang hrang vangin tournament a hmachhawn tam lo bawk - Naomi Osaka chu world ranking chhuak tharah a sang zual 10 zingah a tel phak ta lo.

Japanese star hian 2018 khan US Open nomawi a chawi a, a hnu lamah major title pathum a lak belh tawh. Khawvel player ṭha berte zinga mi a ni a, Grand Slam nomawi hmasa a chawi hnuah tun ṭum hi top 10 huanga a tel loh hmasak ber a ni.

Kum 23 mi Osaka hian rilru lam harsatna a nei, French Open aṭanga a inhnuhdawh hnuah Wimbledon a khel lo. Tokyo 2020 leh US Open a khel a, mahse beisei ang result a nei thei lo.

September thla khan Osaka hian tennis aṭanga a chawlh rih tur thu a sawi a, tun season chhungin a inkhel dawn tawh lo nia ngaih a ni. Mahse, tun hnaiah a inkhelh leh hun chu a hnai tawh niin a sawi leh tawh thung.

Chicago lama hlawhtlinna chang hlim Garbine Muguruza-i'n hma a sawn thung, Spanish star hian a hmaa awm player pathum kal kanin parukna dinhmun a luah - season tawp hmain a kai san leh ngei pawh a rinawm.

US Open champion Emma Eaducanu chu 22-naah a awm chhunzawm a, British tleirawl hi tunkar tawp aṭanga khelh tur Indian Wells-ah a inlan dawn; a tan ranking tih san theihna remchang a ni lehnghal ang.