Bommel-a'n Baku a khawngaih

Germany manager Hansi Flick-a'n ram tana khel tur player a koh zingah Wolsburg defender Ridle Baku a telh lo a, Wolsburg manager Mark van Bommel chuan Baku an ko lo hi pawi a tih thu a sawi.

Flick-a hnuaia Ger-many-in match an neih hmasak berah Liechtenstein (2-0) an hmachhawn a, Baku hian inkhel bul ṭanin minute 60-naah Jonas Hofmann-a'n a thlak. Armenia laka 6-0 a an chak ṭumin Hofman-a'n bul a ṭan ta thung a, Baku hi bench-a ṭhut tluan bakah Iceland (4-0) an hneh ṭumin squad-ah a awm lo a, Reykjavík-ah a zin ve lo.

Wolsburg manager Mark van Bommel chuan, "Hansi Flick-a'n kei leh Ridle te min rawn bia a, thil awmdan a rawn sawifiah. A nihna takah chuan Ridle hian a theihna zawng zawng a chhuah a, hei bak tih theih dang a nei tawh lo. Tute pawhin ram tana khelh an duh a, koh a ni lo hi ka khawngaih," tiin a sawi.

Kum 23 mi Baku hi right back a ni a, ram tan vawi hnih chiah a la inlan. Chutihrualin season liam ta khan Bundesliga team of the season-ah tel pha a, hmabak nei êng tak ni mah se Flick-a'n Baku chungah rinna a nghat ngam lo niin a lang.

Germany hian October 8, Zirtawpni zan dar 12:15-ah Romania an mikhual ang a; October 11, Thawhṭanni zan dar 12:15-ah North Macedonia an hmachhawn leh ang.