Watford coach thar Ranieri

Premier League club Watford chuan Claudio Ranieri chu coach thar atan an lalut a, kum hnih chhung atan contract an ziahpui - a daih rei ang em, tih chu zawhna awm a ni nghal.

Italian coach langsar hian 2015-16 season khan Leicester City chu Premier League-ah a lo champion pui tawh a, Foxes a champion pui hi infiamna khawvela thil thleng ropui ber pawl ang hialin tam tak chuan an ngai.

Foxes hi relegation zone-a hun tam zawk hmang ṭhin kha an ni a, February 2017 khan English club hian ban mah se vawiin thlenga Premier League club langsar an nih chhan langsar tak erawh Ranieri a ni.

Kum 69 mi coach hian nipui transfer lai khan Serie A club Sampdoria a chhuahsan a, club dang nei loa a awm reng hnuin Premier League-a kir turin thutlukna a siam.

Football journalist lar Fabrizio Romano chuan Ranieri hian Italian club aṭangin sawmtu tam tak a nei a, mahse, English football-a kir a thlang ta zawk niin a sawi.

Ranieri hian English football-a a hun hnuhnung ber chu Fulham-ah a hmang a, match 17-ah vawi thum chiah a chakpui a, ni 106 bak a hmang hman lo.

Mahse, Italian football expert James Horncastle chuan, "October 2019-a Sampdoria a enkawl hma khan Serie A match sarihah vawi ruk an tlawm a, table mawngphah an luah bawk. Mahse, game khelh tur la awm chungin a inhamtanpui a, an player neih ṭhat zawng zawng deuhthaw an hralh chungin a season hnihnaah pakuana a nihpui thei.

"Manager theihna nei sang tak a la ni reng. Kum 70 tling turin kar hnih lek hun a nei tawh a, duh ni se chuan Leicester tana a hnathawh ropui tak chungchang sawia hahdam taka zin kual thei tawh tur a ni. Mahse, coaching hi nuam a ti tlat a, a addict tlat - zah a phu a ni," tiin Chelsea boss hlui hi a ring hle.

Watford hian international break zawhah Liverpool an mikhual nghal dawn avangin Ranieri hmabak erawh a awlsam dawn lo tih a chiang a, table-ah 15-na dinhmun an luah mek - league match sarih an khelh tawh aṭangin point sarih chiah an la nei.