Tottenham-in player pahnih chhuah dawn

Premier League club Tottenham chuan ram tana kohna dawng Cristian Romero leh Giovani Lo Celso te chu an feh chhuah an phal dawn. Argentina international pahnih hian ram tan World Cup qualifier an khel ang.

English club lian ṭhenkhat chuan South American ram player an kawlte chu ram tana an fehchhuah an lo phal lo tawh a, hri leng hluarna ram kal tur pawh zin chhuak lo turin an lo ti tawh - Spurs erawhin FIFA duh danin a chhuah tir leh dawn.

Spurs manager Nuno Espirito Santo chuan, "Ram tan an feh chhuak ang, an lo kir leh hunah sorkar dan angin an inkhung hrang leh mai ang. Chuting tur chuan hun leh hmun kan nei, zin chhuak ve lote erawhin training kan nei chhunzawm reng ang," tiin a sawi.

North London club player pahnih bakah hian Aston Villa goalkeeper Emiliano Martinez pawh koh a ni. Player pathum hi an zin chhuak leh a nih chuan England-a an kir leh hunah khung hran an ni dawn a, league match vawi khat chu an khel hman lo ang.

Lionel Messi awmna Argentina hian October 7 hian Paraguay an hmachhawn dawn, a hnuah Uruguay leh Peru nen an inkhel leh ang. World champion vawi hnih ni tawh hian point 18 an nei tawh a, table-ah pahnihna dinhmun an luah mek; an chungah hmahruaitu Brazil chauh an awm.

Argentina squad
Goalkeepers: Franco Armani, Emiliano Martinez, Juan Musso, Esteban Andrada.
Defenders: Gonzalo Montiel, Nahuel Molina Lucero, Juan Foyth, Lucas Martinez Quarta, German Pezzella, Cristian Romero, Nicolas Otamendi, Lisandro Martinez, Marcos Acuna, Nicolas Tagliafico.
Midfielders: Rodrigo De Paul, Exequiel Palacios, Leandro Paredes, Guido Rodriguez, Nicolas Dominguez, Giovanni Lo Celso, Alejandro Gomez.
Forwards: Angel Di Maria, Lucas Alario, Paulo Dybala, Lionel Messi, Lautaro Martine, Angel Correa, Joaquin Correa, Nicolas Gonzalez, Julian Alvarez.