Mancini enkawl Italy an inpeih

Euro 2020 champion Italy chu Nations League khel turin an inbuatsaih ṭan leh tawh a, manager Roberto Mancini-a'n a tira a player koh 23 zinga pahnih an inhnukdawk a, an hmunruak luah tur koh an ni.

Hliam vangin Ciro Immobile a inlan thei dawn lo, Lazio forward aiah hian Juventus striker Moise Kean koh a nih thu Italian Football Federation chuan an puang. Midfielder Marreo Pessina aiah Inter Milan duhlai Fedferico Dimaro chu koh leh hnuhnawh a ni bawk.

Azzurri hian Euro an champion ṭuma an player Leonardo Spinazzola, Alessandro Florenzi, Andrea Belotti leh Gaetano Castrovilli te chu hliam vangin an ko lo vek, Euro lama hliam vanga inlan thei lo AS Roma midfielder Lorenzo Pellegrini tan erawh hun ṭha a inher chhuak ve leh thung.

Italy hian October 6 hian Milan khawpuia awm Stadio Giuseppe Meazza-ah Spain an mikhual dawn, a chak zawk chuan France leh Belgium inkhela chak zawn nen final an khel leh ang - chak lo erawhin pathumna an zawng dawn.

Euro 2020 semifinal-ah khan ram pahnih hi an intawng, inkhel hmuhnawm tak an chhawp chhuah hnuah penalty hmanga chak zawk zawn a ngai a, a tawpah Italy an vannei zawk - tun ṭumah pawh anmahni muala khel tur an nih avangin rinkai zawk an ni ang.

Italy Squad
Goalkeepers: Gianluigi Donnarumma (Paris Saint Germain), Alex Meret (Napoli), Salvatore Sirigu (Genoa).
Defenders: Francesco Acerbi (Lazio), Alessandro Bastoni (Inter), Leonardo Bonucci (Juventus), Giorgio Chiellini (Juventus), Giovanni Di Lorenzo (Napoli), Emerson Palmieri (Lyon), Rafael Toloi (Atalanta), Federico Dimarco (Inter Milan).
Midfielders: Nicolò Barella (Inter), Bryan Cristante (Roma), Jorginho (Chelsea), Manuel Locatelli (Juventus), Lorenzo Pellegrini (Roma), Marco Verratti (Paris Saint Germain).
Forwards: Domenico Berardi (Sassuolo), Federico Bernardeschi (Juventus), Federico Chiesa (Juventus), Moise Kean (Juventus), Lorenzo Insigne (Napoli), Giacomo Raspadori (Sassuolo).