Asian Cup 2019 UAE nen group khata awm India

Asia khawmualpui ramte football-a an inelna sang ber AFC Asian Cup 2019 chu January 5 khian United Arab Emirates-ah khelh a ni dawn a, India chu inelna thlengtu UAE nen group khatah an awm.

India hi UAE bakah Thailand, Bahrain leh Thailand te nen group khatah dah an ni a, draw neih hmaa pot 1-a dah Iran, Australia, Japan, South Korea leh Saudi Arabia te thlirin India-in inelna thlengtu UAE an chang fuh hi 'vannei' tia sawi theih an ni.

Team 24 inelna tur Asian Cup draw hi Zirtawpni zan khan neih a ni a, Dubai khawpuia draw neihah hian team 24 chu group khata team pali zel awmin group parukah ṭhen hran an ni. Asian Cup 2019 match hmasa ber chu January 5-ah UAE leh Bahrain ten an khel dawn a, February 1-ah final khelh a ni ang.

Beiseina
January 6-ah India hian an match hmasa ber an khel dawn a, Thailand nen an intum ang. Hemi hnuah hian UAE (January 10) leh Bahrain (Januaru 14) te India hian an hmachhawn leh dawn bawk a, beiseina a awm.

Team 24 aṭangin 16 chu knockout round lut tur an ni a, team pariat chiahin group stage-ah tournament an khar dawn tihna a ni. Group tina a sang pahnih chu last 16 lut chiang tur an ni a, group paruk aṭanga pathumna zinga point hmu ṭha pali chuan last 16 an lut bawk ang.

Indian legend Bhaichung Bhutia chuan, "Ka ngaihdan chuan group duhawm tak a ni. Kum 2011-a Australia, South Korea leh Bahrain te nena kan awmho kha chu mangchhia ang mai a ni," a ti.

Thlir ila...
Group A-a awm zingah UAE hi inelna thlengtu an nih piahlamah Asian Cup semifinal vawi li lut tawh an ni a, 1996 khan final an lut. Kum 2015-a Asian Footballer of the Year Ahmed Khalil chu an innghahna tur a ni dawn a, Al Ain striker hian ram tan match 96 a khelhah goal 49 a khung tawh. Juventus, Milan, Inter Milan leh Japan coach hlui Alberto Zaccheroni enkawlna hnuaiah beisei an nei sang hle.

India hmachhawn hmasak ber tur Thailand hi team nem ber tura ngaih an ni a, FIFA ranking lamah pawh 122-naah an awm mek. Ghana, Qatar leh Algeria pawh lo enkawl tawh Milovan Rajevac kaih-

hruaina hnuaiah Teerasil Dangda chu player pawimawh tur a ni. JLeague club Sanfrecce Hiroshima striker hian ram tan match 93 a khelhah goal 42 a khung tawh.

FIFA ranking-ah India chu 97-na an ni mek a, Bahrain chu 116-na an ni. Yemen boss hlui Miroslav Soukup hnuaia khel team hian tun dinhmunah player langsar tia chhal tur an nei lo a, Asian Cup-a an thlensan ber ṭum 2004 khan palina an ni.

India dinhmun
2019 hi India-in Asian Cup a khelh vawi lina tur chauh a ni a, 1964, 1984 leh 2011 khan a lo khel ve tawh. Kum 1964 hi football-a India-in hun duhawm a tawn lai a ni a, 1951 leh 1962 Asian Games football champion nichungin India-in inelna an hmachhawn.

Hetih hunlai hian league system-a khelh kual a ni a, zone pathum champion Hong Kong (Central Zone), South Korea (East Zone), India (West Zone) leh inelna thlengtu Israel ten league round-in an khel a, India-in South Korea (2-0) leh Hong Kong (3-1) hneh mah se Israel chu 2-0 a an ngam loh avangin pahnihna an ni a, tun thlengin Asian Cup-a India tawn san ber ṭum a la ni reng.

Kum 1984-ah India-in Asian Cup an khel leh a, Group B-ah China, Iran, UAE leh Singapore te nena awmhoin Iran nen an inhnehtawk (0-0) tih loh chu point hlawhchhuah an nei lo a, group stage-ah an tla.

Asian Cup 2011
AFC Challenge Cup (2008)-ah India an champion a, hei vang hian qualifier khelh ngai loin Asian Cup 2011 khel turin an tling a, kum 27 hnua India-in Asian Cup an khelh leh hmasak ber a ni.

Mizo zingah Churchill Brothers tan Robert Lalthlamuana chu India rama defender langsar ber pawla a invawrh chhoh lai ni mah se 2011-a India squad-ah en kan a ni a, sum tam tak nena team ropui din tum Chirag United tana S. Malsawmtluanga vul lai ni mah se koh zingah a tel lo bawk.

Mizo tel loin India-in Asian Cup an khel a, Australia (0-4), Bahrain (2-5) leh South Korea (1-4) a hneh lo vekin an mualpho a, India goal thum zinga goal hnih chu Sunil Chhetri khung niin Gouramangi Singh chuan goal khat a khung.

Hei le India
AFC World Cup qualifier-a group hmahruaitu leh pahnihna zinga ti ṭha zual pali chu Asian Cup khel turin an tling nghal a, group mawngphaha awm India chuan qualifying playoff round an khelh leh phawt a ngaih phah.

India-in Laso 7-1 a an sawp hnuah Asian Cup qualifier third round khelh leh a ni a, Group A-ah India chu pakhatna nichungin Asian Cup khel tur hian an tling–match ruk an khelhah vawi khat chiah an tlawm.

Blue Tigers tan Mizo tlangval Jeje Lalpekhlua chu player pawimawh niin qualifier-ah hian goal sarih a khung a, Indian player zingah ani aia khung hnem awmchhun Sunil Chhetri chuan goal riat a khung. Jeje hi Lalruatthara leh Jerry Lalrinzuala te nen Asian Cup-ah India tana inlan phak ngei tura beisei an ni.

Eng nge an sawi?
India coach Stephen Constantine chuan, "Ka ngaihdan chuan last 16 luh theihna tur group-ah min dah. Group awlsam tak a ni ka ti dawn lo a, mahse kan khelh ṭhat ni chuan kan group-a team awmte hi kan hneh thei deuh vek ang," a ti a, a team a ringtawk hle.

Blue Tigers captain Sunil Chhetri chuan, "Asian Cup hian he khawmualpuia player ṭha ber berte nena inhmachhawnna remchang min siamsak dawn a, kan tan chuan inzirna ṭha tak a nih rualin a sang thei ang ber thlen tumin kan khel dawn a ni," a ti.

Bhaichung Bhutia chuan, "Asian superpower ho kan pumpelh a, last 16 luh hi theih loh a ni lo," a ti a, Indian midfielder langsar ni ṭhin Climax Lawrence chuan, "India hian Thailand leh Bahrain an hneh theih ka ring a, last 16 luh chance an nei a ni," tiin a sawi ve bawk.