Thluaka thisen zâm chat vangin Hmanhmawh takin Sir Alex an zai

Manchester United manager hlui Sir Alex Ferguson chu May 5, Inrinni zan khan thluaka thisen zam chat (brain haemorrhage) vangin chawpchilh takin an zai. United thuchhuak chuan 'hlawhtling taka zai' a nih thu an sawi a, dam ṭha turin uluk zawka enkawl a mamawh tur thu an tarlang nghal bawk.

Kum 76 mi Ferguson hi Inrinni zing dar 9:00-ah Wilmslow, Cheshire-a an in aṭangin Macclesfield district damdawi-inah hruai a ni a. Hemi hnu hian Police venna hnuaiah Salford Royal damdawi-inah an sawn leh a, hemi zan vek hian he damdawi-ina Hope building-ah zai a ni.

Scottish manager ropui hian April 29-a Manchester United-in Arsenal an mikhual ṭum pawhin Old Trafford-ah inlanin Arsene Wenger-a hnenah hriatrengna thilpek a hlan. Amaherawhchu a fapa Darren Ferguson-a'n Inrinni zana Doncaster Rovers a ho theih loh avangin Sir Alex-a damlo tih rinhlelhna a awm ṭan.

League One club Doncaster chuan, "Rovers manager Darren Ferguson chu chhungkaw thil vangin Inrinni inkhelah a tel thei dawn lo," tiin thuchhuah an siam a, hemi hnu hian club chuan, "Darren hian inkhung fal a duh a, club kaltlangin thil awm dan la sawi chian leh a ni ang," tiin thuchhuah an siam nawn leh bawk.

Ferguson hian kum 1966 khan Cathy chu nupuiah a nei a, an pahnih hian fa pathum Mark, Darren leh Jason te an nei a. Sir Alex hian tuna an enkawlna hmun Salford Royal damdawi-in nen inzawmna an nei a, kum 2010 khan pound maktaduai 200 senga sak Hope building hi a hawng. Kum 2011 khan a ṭhianpa lemziak thiam Harold Riley-a'n exhibition a neih ṭumin Salford Royal hi a tlawh leh a, lemziak pholan zingah Ferguson a lem pawh awmin Hope hospital-ah hian phochhuah a ni.

Tun ṭum hi Ferguson-a'n natna khirhkhan bik vanga damdawi-in a tlawh vawi khatna a ni tawh lo a, kum 2003 khan a lungphu dik loh vangin damdawi-inah enkawl a lo ni bawk.

Ferguson hi British football-a manager hlawhting ber a ni a. An ram Scotland-ah kum 12 chhung club a enkawl hnuin 1986 khan Manchester United hi a zawm a. English club hi nomawi 38 lakpuiin chung zingah chuan Premier League nomawi 13 a tel a, kum 1999-a an treble champion theih nana Bayern Munich an hneh dan te chu tun thlenga sawi hlawh a la ni.