Rangers manager thar Gerrard

Scottish Premiership club Rangers chuan manager atana Steven Gerrard an lakluh thu an puang. Liverpool captain hlui hian Ibrox-ah kum li chhung cham turin contract a ziak a, season thar aṭangin Scottish club hi a enkawl ṭan ang.

Reds youth team coach a nihna bansana Rangers pantu Gerrard chuan, "Rangers manager thar ka ni thei hi ka tan chuan chawimawina ropui tak a ni. He club-in hlawhtlinna leh sulhnu tam tak a lo neih tawhte hi ka ngaihlu a, chhunzawm zel tura hnathawh hlan ka nghakhlel tawh a ni," a ti.

Gerrard hian player a nih laiin Liverpool tan match 710 a khel a, goal 186 khung sakin nomawi liantham pariat a chawipui. Kum 2005 Champions League-a nomawi a chawipui kha tun thlenga sawi hlawh ber a la ni.

MLS club LA Galaxy aṭanga inkhelh a chawlhsan hnua MK Dons-in manager tura an sawmna hnartu Gerrard chuan, "Rangers ang club lian leh sulhnu ngah takin min sawm chuan hnar a har a, fan-te lawmna ka thlen theih ka beisei," a ti.

Gerrard hian Liverpool tana a khelhpui tawh leh Scotland captain hlui ni bawk Gary McAllister chu assistant coach atan a hmang ang.

Eng nge an sawi?
Aberdeen coach Derek McInnes: Khawvel huapa hriat hlawh Steven Gerrard-a'n Scotland a pan hi Scottish football tan a ṭha a ni. Rangers manager hlui Ally McCoist: Magic ang maia thil mak leh ropui a ni a, Scottish football ti hlutu tur a ni.

Liverpool manager Jurgen Klopp: Celtic fan te chuan, "Ka Lawm e Lalpa," tih aiin, "Wow, Steven Gerrard," tih ṭawngkam an hmang ngei ang a, chu chuan engkim a hrilhfiah. Newcastle boss Rafael Benitez: Player-te tana chung en vek tur a ni dawn a, chu chu a ṭha a ni. Ka puihna a mamawh ka ring lo a, a lo mamawh ta a nih chuan a tan ka awm reng e.

Celtic manager Brendan Rodgers: Player a nih anga sulhnu ropui tak nei a ni a, coach a nih tur angin duhsakna ka hlan a, Rangers coach a nihna anga hlawhtling tur erawhin duhsakna ka hlan thei lo.

England legend Gary Lineker: Player a nih laia a ṭhatna zahve chauh pawh kha a chhawm thei a nih chuan a hlawhtling em em ang.

Rangers chairman Dave King: Hun rei tak hnua Rangers-in 'signing' kan neih ropui ber a ni a, Stevie hian hnehna chan dan a hria a ni.