Youth Olympic Games-ah Mizo tleirawl Siami telna India team
October hian Buenos Aires, Argentina-ah Youth Olympic Games 2018 neih a ni dawn a, he huna inlan tur hian Mizo tleirawl Lalremsiami telna India hmeichhe hockey team chu an in vaw tling a, India rawltharte pawhin nomawi chawi chungin Olympic ticket an vaw chhuak ve bawk.
Asian Youth Olympic Games Qualifier khelh zawh takah India tleirawl ten final-ah China 4-1 in ngam lo mah se, silver medal an dawn avangin Asia aṭanga team pahnih inlan tur zingah an tel phak. Mipa team hian Malaysia chu shootout-ah 2-1 a hnehin an champion bawk. India tleirawl leh rawlthar rualten Youth Olympic an khel thei dawn.
Inelna kalphungah mipa leh hmeichhe team a tiṭha pahnih te chu tling chiang sa an ni. Amaherawhchu, Youth Olympic-ah hian ram pakhatin inelna pali – football, handball, hockey leh rugby zinga an duh berah mipa leh hmeichhe team pakhat ve ve chiah an tir thei. Hockey team pahnih te an inlan a nih chuan infiamna huang dang pathumah hian India-in team a tir thei dawn lo tihna, thutlukna chu Indian Olympic Asso-ciation kutah a awm.
Ticket pahnih
Bangkok, Thailand-ah Asian Youth Olympic Games Qualifier hi khelh a ni a, team 11 telna mipa huangah India chu Pool A-ah South Korea, Japan, China leh Thailand te nen an awm a, an inkhelh kual hnuah India hi hmahruaitu an ni.
Semifinal-ah pawh harsatna an la tawk lo, India hian a ṭhenawm ram Bangladesh chu 9-2 ngawta sawpin final an lut. Gold medal inchuhna inkhelah Malaysia nen an inhnehtawk hle a, hun pangngaiah 4-4 a ni. Player pathumin an vuak ṭhin shootout-ah India tan Rabichandra Moirangthem leh Rahul Kumar Rajbhar ten goal khungin, Prashant Chauhan chuan Malaysia lam vuak a dan sak a ni.
Hmeichhe inelna lamah Pool B-ah India nulate chu league round-ah hmahruaitu an ni a, semifinal-ah Malaysia 4-2 in an hneh leh bawk. Amaherawhchu, final-ah erawh China an khing phak lo hle, 4-0 ngawta an hnufual hnuah goal khat khung ve mah se a tawk zo lo a, 4-1 in inkhel a tawp. Chutih rualin a thiam pahnih zinga an tel phak miau avangin Youth Olympic atan an in vaw tling tho.