Prague Open champion Petra Kvitova

Inrinni zana Prague Open final khelhah Petra Kvitova chuan Mihaela Buzarnescu hnehin nomawi a chawi a, hliam dam hnua rawn kir Kvitova tan kumin chhunga a WTA title pathumna chiah a ni nghal bawk.

World number 10 Kvitova-i'n set hmasa berah 3-0 ngawtin hmahruai mah se game khat chiah a lak belh avangin 4-6 in a hloh. Set hnuhnung pahnihah erawh huaisen taka bei letin a tawnhriat ngah a chhawr ṭangkaia 4-6, 6-2, 6-3 in hnehna a chang.

Wimbledon vawi hnih champion tawh Kvitova hian hmeichhe tennis thuneitu sang WTA tournament 23 zetah hlawhtlinna a chang tawh, a khingpui Buzarnescu erawhin a nomawi hmasa ber chawi turin a nghah rih a la ngai dawn.

Kum 28 mi Kvitova hian a chenna inah chem hmanga beih a tawk tawh a, a ban hman thiam lam chu zai niin thla ruk chhung ngawt a chawlh phah tawh. Season hmasa khan a rawn kir a, beisei angin khel nghal lo a, kuminah erawh a khel ṭha hle – Prague Open hma hian Qatar Open leh St Petersburg Open-ah te nomawi a chawi.

Czech Republic nula Kvitova chuan, "A tir lamah tihsual ka ngah a, ho lam takin point ka pe hnem hle. Ka insiam ṭhat hnuah erawh unforced

errors ka nei tlem a, ka tan kawng a inhawng chho ta a ni. Nomawi ka chawi apiang hi ka tan a hlu vek a, a hmasa ber aṭanga tuna mi thleng hian hlu ber sawi theih a ni lo," tiin a sawi.