Brighton-in United an barakhaih

Brighton & Hove Albion chuan Zirtawp zan khan an mual Amex Stadium-ah Pascal Gross-a tauhluh hmangin Manchester United 1-0 in an hneh a, season tharah Premier League an khel leh thei ang.

Goal awmchhun hi minute 57-naah Jose Izquierdo-a cross Gross-a tauh luh a ni a, United defender Marcos Rojo chuan pet chhuak mah se goalline technology hmangin goal hi a pawm a ni.

Seagulls hian hnena chan an phu a, United striker Romelu Lukaku awm loh zanah Belgian striker aia lut Anthony Martial leh Marcus Rashford ten Portuguese manager Jose Mourinho lawmna an thlen zo lo.

Brighton boss Chris Hughton chuan, "Manchester United-in an theihna an lantir ngei a, anni ang team hneh tur chuan kan hna kan tih ve a ṭul a ni. Arsenal, Tottenham leh Manchester United te kan hmachhawn ṭumin kan khel ṭha, zaninah pawh point thum hlawhchhuah hi kan phu a ni," tiin an khelh ṭhat zawk thu a sawi a, Anthony Knockaert leh goal khungtu Gross te chu mimal takin a fak bawk.

Manchester United boss Jose Mourinho chuan, "Brighton khan tum an nei a, an tum hlawh chhuak turin an theihna zawng zawng an hlawh a, chak an phu zawk. Kei erawhin ka naute bulah pahnihna hlut zia sawi mah ila ka hmin zo lo a ni," tiin an rilru put hmang a dik loh thu a sawi.

Martial leh Rashford te chungchang sawi zuiin Mourinho chuan, "Thla 10 chhung eng vangin nge Lukaku chauh kan thlang tih zawhna ka dawng nasa a, tunah chuan a chhan chu chiang takin a lang," tiin English leh French forward duhawm pahnihten Belgian striker an el phak loh thu a sawi.

Manchester United hian Brighton bakah tun season-ah kai thar dang pahnih Huddersfield leh Newcastle United chu khualmualah an hneh tawh lo bawk a, tun season hi kai thar pathum season khata khualmuala an hneh loh vek vawi khatna a ni.