Stoke City-in Premier League an mangṭha
Bet365 Stadium-ah Stoke City fan-ten thawm ring tak chhuah mah se an hmangaih leh ṭan em em club hi an chhan zo chuang lo - Inrinni zan khan an mikhual Crystal Palace chu 2-1 in an ngam lo a, match khat khelh tur la nei mah se an relegate chiang ta.
Stoke City tan Xherdan Shaqiri chuan minute 43-naah freekick hmangin goal hmahruai a khung a, Bet365 Stadium-a thawm chu ring tak a ni. Mahse, Crystal Palace-in second half-ah James McArthur leh Patrick van Aanholt hmangin Stoke an chhanglet a, kum 10 hnuah Stoke-in Premier League an mangṭha a ṭul.
Potters (Stoke sawina) coach Paul Lambert chuan , "Kan tan chuan ni duhawm lo tak a ni a, he club nena inzawm zawng zawngte ka tawrhpui takzet a ni," a ti a, January-a lakluh coach chuan Stoke chhanhim tura hunin a daih loh thu a sawi bawk.
Beisei phak lo
Stoke City tan thih leh dam kar inkhel a ni tawh a, hetichung hian Potters player-te khelh danin beisei a phak lo. Shaqiri-a'n freekick hmanga goal hmahruai a khung hmain Mame Biram Diouf tan ṭha zetin a cross sak a, mah se Senegalese striker hian a tauh goal thei lo.
Switzerland international hian goal a khung hnu, second half-ah pass ṭha zet hmangin Badou Ndiaye a zawng hmu leh a, mah se January-a Galatasaray aṭanga lakluh striker hian ball a 'control' sual a, chance ṭha tak tur kha engmah lo maiah a chantir.
Shaqiri hian Stoke-a a ṭhiante chu an thiam tawk lo niin a lo sawi tawh a, Bayern Munich forward hlui chuan, "He team-ah hi chuan Ronaldinho meuh pawhin eng vak a thlen thei lo ang. Bayern-a Franck Ribéry leh Thiago Alcântara neih a, Inter-a Mauro Icardi leh Mateo Kovacic te nena khelhho nen kha chuan a dan a dang deuh a ni," a ti!
Inter Milan tan pawha lo khel tawh Shaqiri hian Stoke City a chhuahsan ngei a rinawm a, England goalkeeper Jack Butland leh Wales midfielder Joe Allen te pawh chhuak ngei tura ngaih an ni.
A thlawn mai maw
Stoke City hian transfer bazar-ah sum an seng lo a ni lo a, club chairman Peter Coates-a'n player an lakluhna kawngah sum a ren lo - mah se an bazar fuh hleithei lo a ni ber.
February 2016-a club player manto ber ni tura pound maktaduai 18.3-a an lakluh Giannelli Imbula chu Ligue 1 club Toulouse-ah loan-a khelhtir mek a ni a, tun season ṭan dawna pound maktaduai 18-a an lei Kevin Wimmer chu Under 23-ah sawn a ni.
English striker beiseiawm nia sawi ṭhin Saido Berahino pawh U23 lamah khelhtir a ni a, January-a pound maktaduai 14-a lakluh striker Ndiaye lah league match 12 a khelhah goal khat chauh a khung bawk.
Midfield-a duhthlan tur an neih Darren Fletcher, Charlie Adam leh Stephen Ireland te lah an kum a tam tawh tih hai rual a ni lo.
Eng nge an sawi?
Stoke manager Paul Lambert: He hmuna ka rawn kal aṭang khan ka naute hian an theihna zawng zawng an pe a, mah se kan hun neih hian min daih lo a ni. January thla laihawl aṭanga team siamṭhat tum chu a harsa a, player zingah pawh puh tur bik an awm lo.
Crystal Palace manager Roy Hodgson: Stoke khan an nun khawchhuah theihna turin an bei a, kan tan hna awlsam a ni lo.
Palace tana goal khungtu Van Aanholt: Ka goal khung hi a tlangpuiin lawm ka duh ṭhin a, mah se tun ṭum erawh Stoke hnenah hian ngaihdam dil ka duh a ni. Ka goal avang khan relegate lo ula ka duh em em zawk a ni. Mahse, club ropui tak, fans ṭha tak nei in ni a, in lo kir leh thuai ang.