CSK tan Jadeja a ropui

Chennai Super Kings-in IPL nomawi chawi an tumna kawngah hnehna an chan chhunzawm zel a, Ravindra Jadeja wicket thum lak zanah Royal Challengers Bangalore chu wicket rukin an hneh.

Inrinni zan inkhelah RCB an bat hmasa zawk a, CSK tan Jadeja-a'n over li a vawmah run 18 chiah pea wicket thum lain Bangalore batsman an che hleithei lo -Parthiv Patel (53 runs) leh Tim Southee (36, not out) tih loh chu run 10 vaw kai thei pawh an awm lo a, over 20-ah run 127 chiah an siam a, wicket kua an hloh.

CSK-in batsman che ṭha fal sawi tur nei bik lo mah se an bowler te chet ṭhat zar an zo a, over 18-ah an target umphain wicket li chiah an hloh. Inrinni zan inkhel dangah Sunrisers Hyderabad chuan wicket sarihin Delhi Daredevils an sawp bawk. Delhi hi bat hmasa zawkin run 163 chiah an tlin a, wicket nga an hloh. SHR hian over 19.5-ah an target an umpha a, wicket thum hlohin DD tana Prithvi Shaw run 65 chu engmah lo maiah an chantir.

Zirtawpni zan khan Mumbai Indians chuan match kua an khelha an vawi thum chakna ni turin hnehna an chang ve bawk a, Kings XI Punjab chu wicket rukin an hneh. Kings XI hian run 174 siamin wicket ruk an hloh a, MI hian over 19-ah an target umphain wicket li an hloh - run 57 siamtu Suryakumar Yadav chu Mumbai tan chakna hnar a ni.