World Cup beiseitu Neymar

Neymar chuan training a nei ve leh thei ta. Brazil captain hian Zirtawpni khan Paris a pan leh tawh a, tun season chhungin Paris Saint-Germain tan a inlan tawh lo a nih pawhin FIFA World Cup-ah chuan an ram tan a inlan theih ngei a rinawm.

Barcelona forward hlui hi February thla khan Marseille nen an inkhelh ṭumin a hliam a, zai niin inenkawl dam turin an ramah hun a hmang. Footballer manto ber hi tunah chuan a dam tawh a, hliam a tawhna a ke ding lamin ball a pet ngam leh tawh.

Season tawp ruala chhuak tur Unai Emery-a'n a hun hnuhnung a hmang mek a, Thawhlehni zan hian third division club Les Herbiers nen Coupe de France final an khel ang a, Ligue 1 lamah Rennes leh Caen an la hmachhawn dawn bawk - heng match pathumah hian Neymar a inlan a beiseiawm rih lo.

Mahse, June 14 aṭanga ṭan tur World Cup atan chuan Neymar hi inpeih hman tura ngaih a ni. World champion vawi nga ni tawh Brazil-in an match hmasa ber atan June 17-ah Switzerland an hmachhawn dawn a, group match dangah Costa Rica leh Serbia te an tum leh bawk ang.