Emirates Stadium-ah Arsene Wenger thlah nan goal nga

"Premier League match 826 ka hmachhawn a, inkhelh hma leh ban hnuah vawi engzat nge zan mu chhing loa hun ka hman zat chu in chhut thiam ang, mipui lawmna thlen hi ka duh ber a ni a, inkhel hmuhnawm lantir chunga hnehna chan hi ka tum ber a ni, a ni reng bawk ang," tiin Arsenal manager ropui Arsene Wenger chuan a kaihhruaina hnuaia Emirates Stadium-a match hnuhnung ber an khelh hnuah a sawi.

Pathianni zan khan season tawp ruala chhuak tur Wenger hian a hunlaia an sak Emirates Stadium-ah a league match hnuhnung ber ni turin a naute a kaihruai a, an mikhual Burnley lakah 5-0 a hnehna changin–Gunners manager a nih ṭan aṭanga ni 7,876 a liam hnuah amah thlahna hun hman a ni.

Five Star
Mipui 59,867 lenna Emirates Stadium-ah mipui an khat vek a, Wenger thlah tur an nih avangin an manager chhuak tur thlahna thu inziak tarlan hrang hrang a tam hle–fans lamin T-shirt sen hain khelmual chheh vel a sen vul chuk a.

Kum 68 mi Wenger-a'n khelmual a rawn lut tur chu team pahnih player ten zahna chibai 'Guard of Honour' an lo buk–an zingah hian Burnley manager Sean Dyche pawh a tel.

Mualneitu Arsenal lamin atir aṭanga a tawp thlengin inkhel an thunun a, striker manto ber Pierre-Emerick Aubameyang-a'n goal hnih khungin, Gabon international hian a club thar tan match 12 aṭangin goal riat a khung ta, Alexandre Lacazette, Sead Kolasinac leh Alex Iwobi te chuan goal khat ṭheuh an thawh bawk.

Gunners-in point 60 hmuin season tharah Europa League an khel dawn tih a chiang a, French manager kaihruaina hnuaiah Premier League match 826 an khelh niah hian vawi 475 an chakna an tawng nghal bawk. Burnley lakah Arsenal player ten an hna ṭheuh an tlin em em a, hnehna an chang a ni satliah lo–Wenger-a'n kum 22 deuh thaw thupuia a lo neih tawh 'inkhel hmuhnawm lantir chunga hnehna chan' chu a takin an lantir a ni.

#MerciArsene
Arsene Wenger-a'n Arsenal tan Premier League nomawi pathum a chawi hman a, inelna ngaihhlut FA Cup pawh vawi sarih a chawi hman; 1997-98 leh 2001-2002 te khan league leh FA Cup hi a chawi kawp, 2003-04 kuma a sulhnu "The Invincibles" te chu engtikah mah theihnghilh a ni tawh ngai dawn lo a, league match 38 tlawm loa kaltluan hi chu nihrual leh pawh a harsa tawh hle ang.

Manager ropui thlahna inkhel a nih avangin tun hma lama hming langsar ni ṭhinte pawh an tam hle, Martin Keown leh France international hlui Emmanuel Petit te backstage-ah an awm a, Japanese club aṭanga Wenger laluttu David Dein chu tun hnai kum 11 chhunga a vawi khat nan Arsenal directors' box-ah hmuh tur a awm leh bawk!

Burnley nen an inkhelh banah goalkeeping coach Bob Wilson chuan, "Manager kan neih tawh zinga ropui ber a ni," tiin Wenger a thlah a, hun rei tak chhung a assistant ni tawh Pat Rice chuan rangkachaka luan Premier League trophy chu Wenger kutah a hlan bawk–he trophy hi hneh loh nei loa an champion ṭuma club hnena an hlan kha a ni.

Fans pungkhawmin Wenger thlah nan hla an sa a, minute 90 chhung chu an manager tan thawm an nei tluan chhuak zak. "Wenger Out" tia au ṭhinte pawh a hun hnuhnungah meuh chuan a thil tih ṭhat tawhte avangin an rilru a danglam a, amah ngai leh ui em em chunga thlahtute nen thinglung hmun khat puin "Kan lawm e Arsene" tih chu an thupui a ni.

"Eng thutlukna pawh siam ila Arsenal ṭhatna tur zel a ni ang," tia sawi tawhtu Wenger hian season khat daih contract a la neih a hmang zo dawn lo a, a hmangaih Gunners tan a hun hnuhnungah nomawi chawi lo mah se, a sulhnu hnutchhiah tawhte avangin a chunga lawmthu sawi hi Arsenal hmangaihtu te tih awm reng a ni.

Midang pawh
Arsene Wenger a chhuah rual hian midang chhuak tur pawh an awm. Arsenal hmeichhe team enkawl tawh ṭhin, 1996 aṭanga Arsenal's kit manager nihna chelhtu Vic Akers chuan a hna a chhuahsan ve dawn bawk–English pachal, player a nih laia defender ni ṭhin hi kum 71 mi a ni tawh.

Akers bakah hian hmeichhe team captain Alex Scott pawh a chhuak dawn a, senior team captain Per Mertesacker pawhin player a nih laia an khelmuala a league match hnuhnung ber a khel ve bawk. Germany international defender hlui hi season thar aṭang chuan Arsenal academy coach a ni ang.