Zverev-a'n nomawi humhim

Munich Open champion lai Alexander Zverev chuan a nomawi kawl lai a humhim. Pathianni zana final khelhah German rawlthar duhawm hian darkar khat leh minute 31 chhung lekin Philipp Kohlschreiber chu 6-3, 6-3 in a hneh.

World number 3 Zverev-a'n a service a hum tluan thei a, Munich Open vawi thum champion tawh Kohlschreiber service chhuhsak theihna hun ṭha vawi ruk a hmuh chu vawi li a ti hlawhtling a, vawi li aces a siam bawk.

Kum 21 mi Zverev chuan, "Point en hian kan inkhel chanchin a sawifiah lo, a nihna takah chuan a hautak hle a ni," a ti. Zverev hian final lut tur hian amah ang thoa player beiseiawm tak, Australian Open semifinalist Hyeon Chung chu a hneh bawk a ni.

German tlangval Kohlschreiber-a'n tun hmain an ramah hian sulhnu ṭha a lo hnutchhiah ve tawh tho. Kum 34 mi hian 2007, 2012 leh 2016 te khan nomawi a chawi a, clay court-ah bik final vawi ruk a khelhna a ni.