An ramah Marquez tlan chak ber

MotoGP champion lai Marc Marquez-a'n Spanish GP-ah hnehna a chang a, an rama hnehna a chan avangin rider championship-ah pawh hmahruaitu a ni zui nghal bawk.

Pathianni zan intlansiakah Marquez-a elpui Andrea Dovizioso, Jorge Lorenzo leh Dani Pedrosa te chu lap riat tlan tur a la awm tihin an chesual a, Cal Crutchlow pawh palina dinhmuna a din laia a chetsual avangin podium a lawn phak ta lo.

World champion vawi li ni tawh Marquez hian pangana aṭangin bul ṭan mah se, Honda rider hian tun laia a ṭha ber a nihzia a pholang leh a, tun hnai GP hnuhnung pahnihah hnehna a chang thei; point 70 hmuin a chung berah a awm, a hnungah Zarco (58points) leh Maverick Vinales (50) te an awm bawk.

Jerez-a pahnihna ni thei Johann Zarco pawh championship-ah pahnihna a ni zui ve nghal bawk a, Italian rider Andrea Iannone chu pathumnaah a thleng thung.

Yamaha rider Valentino Rossi-a'n a beisei angin podium lawn phak lo mah se mellung pawimawh a phun. Italian tlangval hian 1996 Malaysian Grand Prix khan MotoGP zinkawng a zawh ṭan a, tun thlengin intlansiak tlangkawngah 40,075km a thui a tlan tawh a ni.