Madrid Open-ah Sharapova

Maria Sharapova chuan January thlaa khelh zawh tak Australian Open hnua a vawi khat nan hnehna a chang ve leh ta. Pathianni zan khan Russia nula hian Mihaela Buzarnescu chu 6-4, 6-1 a hnehin Madrid Open-ah bul a ṭan fuh hle.

Grand Slam vawi nga champion tawh Sharapova hi a ban hliam vangin a buai deuh reng a, a zawnin tournament hnuhnung palia a match hmasa ber a paltlang lo vek–hmanni lawk khan Stuttgart Open first round-ah a tla bawk a ni.

Sharapova khingpui Buzarnescu hi tun hnaia khel ṭha tak a ni thung, kar hmasa mai pawh khan Prague Open final a khel. Mahse, Madrid Open-ah erawh 2014 champion Sharapova-i'n a tir aṭangin inkhel a thunun thei a, set hnuhnung zawkah phei chuan game khat chiah a hloh.

Inkhel dangah Simona Halep chuan Ekaterina Makarova chu 6-1, 6-0 in a sawp. Romanian nula hian Madrid Open bikah a zawnin match 13 chhung hnehna a chang tawh a, kuminah pawh nomawi chawi leh thei tura rinkai a ni.