Warriors leh Rockets-in final hnaih

Nimin zing khan Golden State Warriors-in New Orleans Pelicans 118-92 in an hneh a, Houton Rockets-in 100-87 in an hneh ve bawk a. GSW leh Rockets te hian 3-1 in hma an hruai ve ve a, Western Conference final thleng turin vawi khat chak bak an mamawh tawh lo.

Golden King Center, New Orleans-ah Golden State-in bul an ṭan ṭha a, quarter hmasa berah 37-22 in hma an hruai nghal a, quarter hnihnaah talbuai zeuh mah se second half pum an thunun leh bawk avangin hun tawpa an inthlauhna chu point 26 lawih a ni.

GSW tan Kevin Durant chuan point 38 zet a nei a, rebound vawi kua a lak bakah assist vawi nga a nei a, Stephen Curry chuan point 23 a nei ve bawk.

Pelicans head coach Alvin Gentry chuan, "Anni ang team hneh tur chuan point 115 tal kan score theih a ngai a, point 92 chauh score chuan chak ngaihna a awm lo. Defense tih ṭhat lam vak pawh a ni lo a, point 115 kan khung theih loh chuan chak a beiseiawm loh," tiin a sawi a, an khingpui GSW a dah sang tih a lang.

Inkhel dangah Houston Rockets-in Chris Paul (27 pts) leh James Harden (24) te hmangin Utah Jazz an hneh. Kum 33 mi Chris Paul hian season 12 chhung a khelh tawhah conference final a la thleng ngai lo a, season 13-naah final lut thei dinhmunah a ding. Rockets guard Paul chuan, "Tun hmain 3-1 dinhmunah hian ka lo ding tawh a, amaherawhchu beisei angin ka tawp lo," tiin a la ṭawng fimkhur hle.

Nilaini zing dar 5:30-ah Rockets leh Jazz te hian Game 4 an khel ang a, dar 8:00-ah Warriors leh Pelicans te an inkhel bawk ang.

Tukin zing hian Eastern Conference semifinal khelh a ni a, zing dar 3:30 khan Philadelphia 76ers leh Boston Celtics te an khel a, Cleveland Cavaliers leh Toronto Raptors te dar 6:00 hian an inkhel dawn. Celtics leh Cavs te hian 3-0 in hma an hruai ve ve.