Man City-in nomawi an chawi ta

Etihad Stadium-a mipui pungkhawm chuan 'Nah nah nah, Na na na nah, Na na na nah, City...' tiin an zai rual a, Pathianni zan khan tun season-a team ṭha ber leh thiam ber Manchester City chuan Premier League nomawi an chawi ta.

City hian nomawi an chawi hma hian Huddersfield nen goal awm loin inhnehtawk a, amaherawhchu Pep Guardiola hote hi match hnih khelh hmabakah an hmelma Manchester United aiin point 17 in an fal a, champion an phu dan a la ngai reng.

Roreltu City
Pep Guardiola-a'n an duh dan mila Man City khelhtir turin player duh dan bik a ni a, chumi tura nipui leh thlasik bazara an sum hman zat belh khawm chu pound maktaduai 250 a tling.

Spanish manager thutluknaa langsar tak chu season hmasa lama a lakluh Claudio Bravo thlauh thlain Ederson Moraes chungah rinna a nghat ngam a, Brazilian keeper hian Pep-a duh dan taka khelin tlarhnung aṭangin bul an ṭan a, an khelh dan thlirin awmze neiin a lo thlawnin sum an hmang lo.

Pep-a hnuaia City khelh dan zunzama uai zingah Gary Lineker pawh telin England striker hlui chuan, "Guardiola football khelh dun dan hian kan rama football khelh danah pawh nghawng a nei dawn. A hmuhnawm ringawt a ni lo a, hlawhtlinna a keng tel," tiin a fak.

City hian Premier League an thunun tih an record thlirin a chiang a, match nga la awmin an champion a, 2000-01 season-a Manchester United record siam tawh chu an nihrual chiah a. Pep-a hote hi vawi 18 an chak zawn a, chak zawn rei ber record siamin hemi rual hian khualmuala chak zawn rei ber record Chesea-in (vawi 11) kum 2008 a an siam tawh chu an nihrual tawh bawk.

Pep-a hote hian match hnih khelh tur an la nei a, record dangin a la hmuak. Tunah hian point 94 an hmu tawh a, 2004-05 season-a Chelsea point hmuh zat 95 chu an khum ngei dawn niin a lang a, point 100 hmu hmasa ber an la ni thei bawk.

City hian goal 102 an khung tawh a, Chelsea record 103 goals (2009-10) chu an khum ngei dawn. Goal difference tam lamah phei chuan Blues-in 2009-10 season-a an siam +71 chu an khum tawh a, tuna an goal difference hi +76 ni mekin season zawh rualin an record hi an nemnghet thei ang.

Eng nge an sawi?
Captain Vincent Kompany: Kum dang zawng aiin champion hi kan phu a ni. Inhliam vangin player lut leh chhuak an awm zut a, kan khelh danah nghawng a nei lo. Coaching staff-te thawhrah a ni.

Defender John Stones: Duthusam a thleng. Helai hmuna kei leh Kyle Walker te kan kalna chhan chu nomawi kan duh vang a ni a. Nomawi chawi nawm dan tur hi ka suangtuah thiam ṭhin lo a, tunah chuan ka hrethiam ta.

Forward Raheem Sterling: Kan hlawhtling ta. Nomawi han chawi chiah chu a nawm dan a dang hle.

Midfielder David Silva: Ka tan chuan Spain leh England kar tawn reng a ngai chungin kan team kan khelh ṭhat miau avangin hun harsa pawh a ziaawm a, kan tum ram kan thleng ta a. A lawmawm hle a ni.

(David Silva hi a fapa a hun hmaa a pian avangin Spain-ah a haw a ṭul ṭhin)