Chelsea-in Reds an ngam; boruak a 'hot'
Pathianni zan khan Chelsea chuan an mikhual Liverpool 1-0 in an hneh a, Champions League khelh inchuh boruak a 'hot' zel. Inkhela goal awmchhun hi Olivier Giroud-a'n a tauh luh a ni.
Liverpool hian Premier League table-ah pathumna dinhmun an luah chhunzawm zel a, an hnuaia awm Tottenham Hotspur leh Chelsea aiin match khatin an khel tam zawk ve ve–Spurs aiin point khatin an sang a, Chelsea aiin point thumin an la sang zawk bawk.
Chelsea manager Antonio Conte chuan, "Keinin point kan hlawhchhuah laia kan khingpuiten an hloh thung hi a lawmawm lai chu a ni. Thla khat liam taah kha chuan Champions League khelh beisei ngam chi a ni lo a, tunah erawh beiseina nen kan nung thar leh ta," a ti.
Giroud, Vanlal Giroud!
Liverpool-in first half-ah 66% possession an nei a, Stamford Bridge-a inkhel ṭantir lam thununtu chu mikhual team an ni a, chance pawh an ngah. Reds hun neih ṭhat ber chu Sadio Mane ko-ah a tla a, mahse Senegalese forward hi a hun ṭha neihah Thibaut Courtois chuan vawi hnih ngawt a ti beidawng.
Tiemoue Bakayoko-a'n a chance neih uiawm zeta a hlah hnuah Arsenal duh loh Giroud a inlar a, French striker hian ball kanga a hlauhawm zia pholangin Victor Moses-a ball cross chu a tauh lut. Cesc Fabregas-a'n fing zeta ball a lakluh hnuah chance a neih chhunzawm a, angle tight karah a khung thei lo.
Second half-ah Chelsea an chungnun chhunzawm a, Eden Hazard mawi zet a 'lam luh' ṭhelh hnuah Antonio Rudiger-a ball tauh luh chu offside vanga pawm a ni lo a, Marcos Alonso-a volley goal lo pawh uiawm tak a ni.
Dinhmun him lo
Liverpool-in Champions League quarterfinal aṭanga 5-1 a Manchester City an hnawhchhuah hnu lawkah 3-0 in Bournemouth an hneh a, Chelsea aia point 12-a an san fal bawk avangin April 14-ah kha chuan Champions League khel turin an dinhmun a him tawhah ngaih a ni.
Mahse, Liverpool-in an hneh ngei tura ngaih West Brom leh Stoke City an inhnehtawkpui a, hetihlai hian Chelsea-in Southampton, Burnley leh Swansea City an lo hneh thung si a, dinhmun him tawha ngaih Reds dinhmun a him loh phah.
Hetihrual hian Chelsea tan dinhmun ṭha ta viaua inngaih chi erawh a ni lo–Liverpool aiin goal 15-in an khung tlem zawk a, an match hmabaka Huddersfield leh Newcastle United an hneh a nih pawhin Brighton lakah Liverpool an chak chuan Reds hian Champions League an khel chiang ang.
Fab Three = NIL
Liverpool-in May 26 zanah Champions League final an khel dawn a, hahdam taka Real Madrid hmachhawn thei tura ngaih team hi an league match hnuhnung pathumah an chak zawh tak loh avangin match hautak pahnihin a hmuah phah.
Reds fan-te tana hriat nuam lo tak tur chu Europe-a tlarhma inkawp hlauhawm bera ngaih Mohamed Salah, Roberto Firmino leh Sadio Mane te tun hnaiah ṭum dang angin an khel lo–player pathum hi an hmasial lohna leh inthlawp tlanna avanga fak hlawh ṭhin an ni a, chu chu tun hnaiah erawh hmuh tur a awm lo.
Liverpool khelh dan tlangpuiah counter attack hmanga an khingpui an nawrin player pathumte an in zawng tawn ṭhin a, an tlan chak bakah ball an thiam bawk avangin chu chuan an khingpui team tan harsatna a thlen ṭhin–tun hnaia an match-ah erawh chu chu hmuh tur a awm lo a, player pathumten ṭum dang zawng aiin an hma an sial niin a lang. Salah-a ball hmuh tlem danin chiang takin a hrilhfiah.
Eng nge an sawi?
Chelsea manager Antonio Conte chuan, "Hnehna chan ngei ngei mamawh chungin team ṭha tak kan hmachhawn a, a sang pali zinga tel tura kan beiseina chhi nung turin hnehna kan chang thei a ni. Ka player leh fan-te ka lawmpui takzet a, khatianga ṭhaa khelha result duhawm neih hi an phu a ni.
"Kan tum hmasak ber chu a ṭha thei ang bera season khar a ni a, fan-te lungawina thlenin season kan tawp theih ka beisei. Season harsa tak a ni a, mahse a tawp thleng kan bei ang. He league hi chu a ṭantir aṭangin top six team kan awm nghal a, a awlsam lo a ni," a ti.
Liverpool boss Jurgen Klopp chuan, "Result duhawm lo tak a ni a, kan khelh dan en erawh chuan point hmuh kan phu a ni. Chelsea ang team ṭha kan tum chuan ball cross loh tir kha kan tum tur a ni a, mahse kan hlawhchham a ni," tiin a sawi.