El Clasico-ah chungnung zawk an awm lo
Pathianni zanah Barcelona leh Real Madrid 2-2 in an inhnehtawk. Catalan club-in Luis Suarez leh Lionel Messi hmangin ṭum hnih hma an hruai a, Los Blancos-in Cristiano Ronaldo leh Gareth Bale te hmangin an sut ve ve.
Inkhelh hmaa Zinedine Zidane-a'n a sawi lawk ang ngeiin Los Blancos-in La Liga champion hi guard of honour pe lo mah se tun season La Liga-a hneh loh la tawng lo Catalan club hian Real Madrid player-te chhuah hnuah mual laiah an chai a, mipui an zai rual thung.
Goal li leh red card
Real tan BBC - Benzema, Bale leh Cristiano Ronaldo ten bul an ṭan vek a, goal khung hmasatu erawh Barcelona an ni.
Catalan club tan Suarez chuan minute 10-naah dinglam aṭanga Sergi Roberto cross chu goal-ah a chantir a, Uruguayan forward siam saktu Roberto hi first half injury time-ah Marcelo kut a thlak nia a lan avangin an hnawt chhuak.
Real tan Ronaldo chuan minute 14-naah Benzema siam sak chu siphurh sut nan a hmang a, Portugal captain hi ngalrek hliam vangin second half-ah a inlan tawh lo.
Minute 53-naah Lionel Messi a rawn inlar a, Argentina captain hian Suarez aṭanga a ball hmuh chu a ke vei lama a pet theih turin a siam rem a, a thiam dan takin a khung. Minute hnih hnuah Suarez hian goal net puar pawpin a khung leh a, amaherawhchu Ivan Rakitic chu offside-ah ngaiin an pawm sak lo.
Los Blancos-in Bale hmangin minute 72-naah an siphurh an sut a, keeper Marc-Andre ter Stegen tan dan ngaihna a awm lo. Hemi hnu hian Brazilian left back Marcelo chu box chhungah Jordi Alba-a'n a titlu a, referee Hernandez-a'n penalty-ah a ngai lo a, 2-2 in inkhel a tawp.
Engtin zel?
Ronaldo leh Messi te goal khung zanah referee Hernandez a langsar a, ani hian Barca goal khung a pawm sak lo a, Real penalty a pek loh bakah Messi goal khung hmaa Suarez-a'n Varane laka a foul chu a ham lo.
Real boss Zinedine Zidane chuan, "Khelh chhan tur awm tawh lo nachungin inkhel ṭha tak a ni a, referee tan pawh a harsa ang. A pawimawh ber chu football a ni," tiin referee a chhan.
Barcelona boss Ernesto Valverde chuan, "Referee tan a awlsam lo tih a chiang a. Chutihrualin Sergio Roberto khan a kut chu lek mah se red card tur em chu a ni lo, amah ka hriatchian vanga ngaihdan nei pawh ka ni thei ang," tiin a sawi.
Spanish player ropui Andres Iniesta tan Pathianni zan inkhel hi El Clasico vawi 28-na leh hnuhnung ber a ni a, minute 58-naah lakchhuah niin mipuiin player ropui hi standing ovation an pe.