Premier League khel tur Cardiff
Cardiff City chuan Pathianni zan khan Reading chu goal khung loin an inhnehtawkpui a, match dangah an elpui Fulham an tlawm bawk si avangin season tharah Premier League an khel dawn.
Welsh club-in season thara Premier League an khelh tur an lawm laiin an inhnehtawkpui Reading lawmna erawh a dang thung a, an in draw avang hian relegate thei dinhmuna ding team hian season tharah Championship an la khelh chhunzawm ang.
Bolton Wanderers chuan Nottingham Forest lakah comeback ropui lantirin 3-2 in an hneh a, team 24 inelnaah 21-na nichungin season tharah Championship an la khel dawn - Bolton hian Adam Le Fondre hmanga goal hmahruai an khung zet hnuah Forest tan Ben Osborn leh Jack Colback ten an chhanglet.
Tlak hlau Bolton an beidawng duh lo a, hun tawp nan minute li chiah a awm tawh tihin David Wheater leh Aaron Wilbraham hmangin an chhanglet a, an him phah.
Wolverhampton Wanderers chuan Championship league match tawp ber khelh zanah hian League One lama tla chiang tawh Sunderland chu 3-0 in an ngam lo a, anmahni hnaih bertu Cardiff aia point kuaa sangin season thar Premier League an hmachhawn dawn.
Season thara Premier League khel turin Wolves leh Cardiff an tling chiang ta a, hmunruak pakhat la awm chu Fulham, Aston Villa, Middlesbrough leh Derby County ten playoff hmangin an chingfel ang.