Harhna chan chhunzawm Mumbai

Indian Premier League-ah Mumbai Indians-in an harhna chan an chhunzawm zel - Kings XI Punjab an hneh hnu lawkah Pathianni zan khan hnehna an chang ve leh ta a, an mikhual Kolkata Knight Riders chu run 13-in an hneh.

Mumbai khawpuia inkhelah mualneitu an bat hmasa zawk a, batsman ding chhuak hmasa pahnih Suryakumar Yadav (59 runs) leh Evin Lewis (43) te an chet ṭhat nghal avangin harsa lutuk loin run 181 an siam a, wicket li chiah an hloh.

KKR tan opener Chris Lynn (17) leh Shubman Gill (7) te awlsam taka an out nghal avangin KKR an hlauthawng hma. Robin Uthappa (54 runs) chu pangngai taka rawn bat ve lehin beiseina rawn siam mah se an hlim chhung erawh a rei lo - over 20-ah run 20 bak an tlin thei lo a, wicket ruk hlohin an tlawm.

Pathianni zan inkhel dangah Kings XI Punjab an insiamṭha ve lehnghal bawk a, Mumbai Indians an hneh loh hnua an match hmasa berah Rajasthan Royals chu wicket rukin an hneh ve bawk.

Rajasthan Royals hi bat hmasa zawkin over 20-ah run 152 chiah an tlin a, wicket kua an hloh - run 51 vaw chhuaktu Jos Buttler che ṭha viau mah se a ṭhian dang zingah run 30 vaw kai thei an awm lo a, hei hi an chet chhiat phah.

Kings XI tan Mujeeb Zadran-a'n a vawm ṭha takzet a, kum 17 mi Afghan bowler duhawm hian over li a vawmah run 27 chiah a pe a, wicket thum a la - Jos Buttler leh Ben Stokes vawm out tu a ni.

Punjab club bat hun a thleng a, opener KL Rahul a che ropui nghal - Kings XI batsman dang zingah che ṭha tia sawi tur awm lo mah se Mangalore tlangval hian ball 54 lek a hmachhawnah run 84 a rawn vaw chhuak a, a tawp thleng damin a team hnehna a chanpui.

Kings XI hian over 18.4-ah an target an umpha a, wicket li chiah an hloh - KKR bowler ten KL Rahul an ngam loh an tuar.