Napoli chesual nawn

Hun pawimawh vang­lai takin Napoli an chesual leh ta. Pathianni zan Serie A inkhelah Napoli hi an mikhual Torino nen 2-2 in an inhnehtawk a, champion lai Juventus tan an nomawi humhim turin point khat bak hmuh belh a ngai tawh lo.

1990 hnua Italian champion nih leh tum Napoli hian Dries Mertens leh Marek Hamsik te hmangin vawi hnih hma hruai mah se, mikhual lamin Daniele Baselli leh Lorenzo de Silvestri te hmangin an sut zel a, point khat ve ve an hmu. Juventus an hneh hnuah champion beiseina nei sang viau mah se Fiorentina lakah 3-0 in an tlawm a, Torino lakah point thum an hmuh zawh loh leh tak avangin an beiseina a tawp.

A zawna season ruk champion tawh Juventus lamin point rukin hma an hruai fal ta a, Turin club hian Champions League khelh tum AS Roma leh relagate tawh Hellas Verona te an la hma­chhawn dawn a, Massi­miliano Allegri naute hi chhiarkawp danin la champion chiah lo mah se an tan nomawi chu chawi theih maiin a awm tawh.

Napoli manager Maurizio Sarri-a'n uiawm takin Serie A nomawi a chawi lo chiah dawn niin a lang ta a, Italian manager hi Premier League pan tura sawi thawm a ri ring hle - manager zawng lai Arsenal leh Chelsea te nen sawi zawm a ni.

Amaherawhchu, Sarri chuan, "He hmunah hian ka hlim rih a, hma hun sawi a la hun rih lo. Khawvel hmun hrang hrangah kal kual pawh ni ila Napoli fans anga ṭha hi chu hmuh tur an awm dawn chuang lo, anni nena hnathawh hi a nuam," a ti. Napoli captain Marek Hamsik pawhin an coach chu chhuak lo tura a duh thu a sawi ve bawk.