SAFF Championship India tan chak a ngai - an hmaah Sri Lanka
SAFF Championship-a an match hmasa bera an chak zawh loh hnuin vawiin tlai dar 4:30-ah India an inlan leh dawn a, vawi hnih khelh tawha chak la nei lo Sri Lanka nen an inkhel ang.
India-in player pakhata khel tam zawk chungin an match hmasa berah Bangladesh an inhnehtawkpui a, Blue Tigers coach Igor Stimac leh a nauten sawiselna an tawk nasa - zaninah heng sawiselna zawng zawng hi thai bo a ṭul dawn.
Sri Lanka-in an match hmasa berah Bangladesh chu 1-0 in an ngam lo a, an match hnihnaah Nepal chu 3-2 in an hneh lo zui. Golden Army (Sri Lanka sawina) hian final luh beisei tur chuan chak an mamawh.
India buaina
Bangladesh nena an inkhelh ṭumin India-in minute 26-naah Sunil Chhetri hmangin goal hmahruai an khung a, minute 54-naah Bangladesh defender Bishwanath Ghosh chu hnawhchhuah a nih bawk avangin India hi chak tura ngaih an ni.
Mahse, minute 90 chhungin team tenau zawka ngaih Bangladesh an chungnung tluan chhuak zak a, an si phurh hial rawn sutin 1-1 in an inhnehtawk. Inkhel entute chuan India khelh dana a lungawithlak lohzia an hmu ang.
Mizo striker Jeje Lalpekhlua'n hliam vanga ngai a la awh leh loh hnuah Chhetri-a'n kawppui tur ṭha mi a la hmu lo a, Manvir Singh-te han sawi vul viau ṭhin mah se eng an ang lo.
Ngaihlai Jeje
India captain Chhetri hian, "Jeje hi player chak ṭha tak a nih avangin defender-in dan harsa an ti ṭhin a, chu chuan ka tan hna a ti awlsam em em ṭhin a ni," tiin Mizo tlangval khelhpui nuam a tih thu a lo sawi tawh.
June 7, 2018-a Vanglaini zirchianna aṭanga a lan danin India tana Chhetri leh Jeje ten bul an ṭanin win percentage hi 63.88% a tling a, Indian striker ṭha pahnih hian ram tan match 36-ah inkhel bul an ṭan dun a, goal an khung zat chu 45 a ni.
Mahse, June 7 hnuah hian Jeje-a'n ram tan match sarih chiah a khel leh tawh a, heng zingah hian minute 90 khelh tlin a nei lo a, goal khat chiah a khung - khup hliam vanga Hnahthial tlangval buaina hi India tan buaina a tling.
Stimac-a duhthlanna
Bangladesh laka India inkhel thlirin tlarhmaah player-te an inman tawk lo a, midfield leh forward an inman lo a, a buai vel vek a ni ber. India-in creative midfielder ṭha a mamawh tih a lang a, bench aṭanga lut Brandon Fernandes-a'n danglamna a keng tel lo bawk.
Tun hnaia khel chhe thei tak Rahul Bheke chu Sandesh Jhingan inhliam vangin centre back-ah khelhtir a ni a, tam takin Bheke koh a nih chhanah India coach hi zawh belh duh an nei ngei ang. Bangladesh lakah Lalengmawia'n bul a ṭan lo a, zaninah pawh Vaivakawn rawlthar hi a inlan dawn leh dawn loh sawi chian theih a la ni lo.
Blue Tigers squad-ah Udanta Singh lo kir mah se Chhetri goal khung tur a siamsak tih loh chu chhuan tur a nei lo a, Rahim Ali leh Liston Colaco ten beisei an phak lo bawk - Sri Lanka lakah beisei an phak lo leh a nih ngat chuan Stimac-a'n zawhna chhan tur tam tak a nei dawn.
Sri Lanka chu
FIFA ranking-a 205-na ni pha ṭawk team hi India tan tum hautak tura ngaih an ni lo a, mahse, Bangladesh laka an khelh dan en chuan India hi dah san bik harsa tak an ni - Golden Army hian chak loh an duh dawn lo.
Sri Lanka coach Amir Alagic hi Werder Bremen assistant coach pawh lo ni tawh a, Asia khawmualpuia tawnhriat nei ṭha tak ni bawk a ni a, East Bengal pawh 2012-13 season khan a lo enkawl tawh avangin Indian football hrechiang a inti ang.
Queens Park Rangers Under 23 winger Dillon De Silva hi Sri Lanka tan tlarhmaah innghahna a ni leh dawn a, English football division hniam lama a hun tam zawk hmangtu Marvin Hamilton hi ngaihthah thiang lo tur a ni bawk.