KHAWTHLIR

Nimin khan Dy. Chief Minister, ministers leh Lunglei HPC Vice Chairman chuan basic pay aṭanga May thla hlawh 50% chu Chief Minister's relief fund-ah an thawh a, an sum thawhkhawm chu Rs. 4,80,000 a ni. Anni ho hian an hlawh December thleng an hlawh 50% hi CM relief fund-ah hian an thawh dawn.

Mizoram leh Myanmar ramri, Fungsihchhuaha ramri venga duty laia a damloh vanga June 9, Thawhlehnia thi H Lalvenmawii (18) d/o H Kapliana, Sangau-I chu Mizoram sorkarin Rs. 1,00,000-in a rál dawn. Sorkarin a ràlna sum hi Chief Minister's Relief Fund aṭangin pek a ni dawn a, Lawngtlai DC kaltlanga pek a ni ang. LADC sorkar pawhin Rs. 50,000-in a rál dawn nia thu dawn a ni.

Evangelical Church of Maraland (ECM) ṭhalai pawl - KTP-a Gilgal leh Bethlehem branch-te chuan nimin khan ECM-KTP Day pualin Siaha District Hospital tan thisen unit 34 an pe a, a petute mipa 28 leh hmeichhia paruk an ni. Bethlehem aṭangin mi 15 leh Gilgal aṭangin mi 18-in an pe a ni.

Kolasib District Border Safety Monitoring Team chuan Covid-19 donaa khaw hrang hranga ramri depa duty task force-te nimin khan an tlawh. Border Safety Monitoring Team-te hian Bilkhawthlir, Saiphai, Saipum, Phaisen, Saihapui-' leh North Chhimluang khuaa task force-te an tlawh a; ṭhelrêt kawr, hmai tuamna, silpauline leh pawisa an pe a ni.

Khatla South mi, an veng ṭhenawm quaran­tine centre-a awmte ruihhlo a pek ṭhin vanga man chu ZMC laboratory-ah a swab sample endik a ni a, Covid-19 a kai lo tih hmuh a ni. Ruihhlo pe ru ṭhin hi police-in an lak hnuah sorkar quarantine centre-ah dah a ni.

Lunglei District Magistrate chuan, The Mizoram Epidemic Disease (COVID-19) Regulations, 2020 11(1)(b) behchhanin Lungleia hmun pali chu containment area-ah a puang. Containment area-te chu - Lunglei College huam chhung leh a thlang lam meter 20 huam chhung, Lunglei H/S huam chhung, BCM Electric Veng aṭanga hma lam Zuimawii in péng inkar leh chhim lama Zahmingthanga te in inkar, Lunglawn kawng chung péng aṭanga Lianchami in inkar leh Lianchami in 

aṭanga thlanmual no.1 inkarte a ni.

Women and Child Development director Vanlalpianpuii chuan nimin khan Aizawl district-a children's home-te a tlawh a; PPE leh mamawh dangte a pek bakah, Covid-19 laka naupangte himna tura home-te hmalakna a enfiah. Aizawl district-ah children’s home 22 a awm a, home hmunhmáte chu State Child Protection Society leh Aizawl District Child Protection Unit ṭangkawpin disinfectant-in an phuh fai mek a ni.

Siaha district-ah nimin chawhnu dar 2:30 thleng khan quanrantine facility hrang hrang 25-ah mi 740 an awm mek a, mipa 402 leh hmeichhia 338 an ni. Home quarantine mek mi 17 (mipa 7 leh hmeichhia 10) an awm bawk.

Lawngtlai West bialtu MLA C Ngunlianchunga chuan nimin khan Lawngtlai khawpui chhunga qua­rantine centre 14 te hnenah kutkawr, hmaituamna leh hand sanitizer a pe.