Asian football a ‘hot’ chho

FIFA World Cup 2022 quali-fication (AFC) third round chu vawiinah khelh chhunzawm a ni ve leh dawn a, inkhel paruk ngawt en tur a awm dawn - boruak a 'hot' chho hle.

Third round-ah hian team 12 an la inel a, group pahnihah team paruk ve ve awmin ṭhen hran an ni - group pahniha a sang pahnih hi Qatar-a World Cup khel turin an tling chiang ang.

Group pahniha pathumna team ve ve chu single match khelin an inhmachhawn leh ang a, he inkhela chak zawk hian inter-confederation playoff hmangin World Cup khelh an la beisei ve leh thei a ni.

Vawiin tlai dar 4:30-a South Korea leh Syria inkhel tur hian ngaihven a hlawh a, group A-ah Syria hian match hnih aṭanga point khat chiah an neih laiin South Korea erawhin point li an nei tawh thung.

South Korea tan captain Son Heung-min bawk chu player langsar a ni leh dawn a, chutihrual chuan he team hian Wolverhampton Wanderers forward Hwang Hee-chan, Rubin Kazan midfielder Hwang In-beom leh Bordeaux forward Hwang Ui-jo te ho an nei tih hriat tel a ṭha.

Syria hian South Korea angin player nei langsar lo mah se Al Wahda forward Omar Kharbin leh Al-Ahli forward Omar Al Somah te ho an neih avangin zuam sual ve theih tak tho an ni ang.

Zanin dar 10:15-a match hniha point hnih nei United Arab Emirates leh match hniha la chak ve ve Iran inkhel tur pawh hi a hmuhnawm dawn. UAE player-te hi mahni ram club veka khel an ni a, mahse, hei tak hi an chakna a ni - an inhrechiang tlat.

UAE striker Ali Mabkhout hi ram tan match 94-a goal 77 khung thei a ni a, ani hi ngaihthah a thiang dawn lo. Iran-in Porto goal khung khawl Mehdi Taremi, Zenit Saint Petersburg chhuanvawr Sardar Azmoun, Feyenoord midfielder Alireza Jahanbakhsh leh AEK Athens left back Ehsan Hajsafi te ho an nei a, an ngaihtuahawm lo hle.

Zanin dar 10:30-a Saudi Arabia leh Japan inkhel tur hi sawi hmaih a thiang lo. Japan-in match hnihah point thum chiah an la neih avangin insiamṭhat an mamawh a, Celtic forward Kyogo Furuhashi, Liverpool midfielder Takumi Minamino, Arsenal defender thar Takehiro Tomiyasu leh Sampdoria defender Maya Yoshida te ho an neih avangin insiamṭha thei pawh an ni.

Saudi Arabia-in European football-a inkhel player nei lo mah se match hnih an khelh tawha chak ve ve thei an ni a, tawnhriat nei ṭha midfielder Fahad Al-Muwallad leh defender Yasser Al-Shahrani te ho an neih bawk avangin Japan an hlau bik lo ang.