Pau Gasol a chawl ta

Spanish basketball player ropui Pau Gasol chuan Thawhlehni khan hlawhtling taka kum 23 chhung a khelh tawh basketball a chawlhsan thu a puang.

Kum 41 mi Gasol chuan, "Thutlukna harsa tak siam a ṭul ve ta a, professional basketball aṭanga ka chawlh thu sawi turin inhmaah ka rawn ding a ni. Ka game ngainat hi hun rei tak ka khelh tawh avangin thutlukna siam a harsa a, chuvangin thutlukna siam tur hian uluk takin ka ngaihtuah a ni," tiin a sawi.

Feet sarih leh inch khata sang Gasol hian Barcelona tan kum 1998 khan khel ṭanin kum 2001-ah NBA team Memphis Grizzlies a zawm. Spanish player hian kum 2008-ah LA Lakers a zawm a, kum 2009 leh 2010-ah a champion pui.

Gasol hi NBA All Star-ah ṭum ruk ngawt hlan a ni a, Lakers zawh hian Chicago Bulls leh San Antonio Spurs tan khel leh bawk. Inhliam vangin a hun tawp lamah a inlan tam tawk lo a, Milwaukee Bucks leh Portland Trail Blazers ah theihna angin a khel chhuak lo.

Kumin kumtir khan Barcelona-ah Gasol hi a kir a, June thla khan kum sarih hnuah a naupan laia khelhna Barcelona chu a champion pui. Olympic-ah Spain tan hmun pawimawh a chang ṭhin a, kum 2008 leh 2012 khan silver medal lakpuiin kum 2016 khan bronze medal a la. Tokyo 2020-ah erawh Gasol-a telna Spain-in United States hneh loin quarterfinal-ah an tla.

Gasol hi Lakers-ah basketball legend Kobe Bryant nen an khelho ṭhin a, a chawlh thu a puan pawh hian helicopeter chetsualna avanga nunna chan Bryant hi a hre reng. Spanish player ropui chuan, "Vawiin angah hian Kobe Bryant hi ka bulah awm ve se ka duh a, a chang hi chuan khuanu remruat dan hi hriatthiam a har ṭhin. A hnen aṭang khan thil tam ka zir a, u ang maia ka en a ni," tiin a sawi.