Mbappe-a'n PSG chhuahsana Real zawm a duh

Kylian Mbappe chuan tun hnai khan a hma hun leh thil tawn tawhte a sawi chhuak nual a, nipui bazar inhawn lai khan Real Madrid zawm duh mah se a khelh mekna Paris St-Germain duh dan anga a cham tak zawk thu a sawi.

France international hian season kal lai daih bak chu PSG tan contract a nei tawh lo, a contract a zawh hunah chuan a duh lai a hawi thei dawn - a chhuak dawn a nih chuan Spanish club lian chu a pan duh ber thu pawh a sawi lang.

Chhuah duh Mbappe
AS Monaco tan nomawi a chawi hniah Mbappe hian 2017 khan PSG hi a zawm, a man zat hi pound maktaduai 165.7 zet a tling - Paris club tan hian season ngana a hmang mek a, inelna hrang hrangah match 182 khelin goal 136 a khungsak tawh.

A naupan lai aṭanga Real Madrid ngaisangtu a ni a, engtik niah emaw chuan Real tan ka la khel ve ang, tia duhthu lo sam ve tawh ṭhin kha a ni. A duhthusam tih hlawhtlin theihna remchang a nei dawn - hun rei a ngah a ngai tawh lo ang.

Mbappe chuan, "July thla tawpah khan ka chhuah duh thu hi club ka hrilh tawh. Transfer ti fel turin ka sawi hma tawkah ka ngai, chhuah ka duh tih kha zep tur a awm lo. News lama ka lo hmuh dan chuan August thla tawpa chhuah dil ang ka ni, kha chu a dik lo," a ti.

Nipui bazar lai khan Real Madrid chuan Mbappe hi lak an tum a, pound maktaduai 137 vel bawrin an dawr - an dawrna hmasa an hnawlsak hnuah pawh pawisa hi belh leh a ni a, mahse an hnawl leh ta tho. A rilru chu chhuak hman mah se a taksa a la chhuak fel ve lo a ni ber.

A cham si...
Arab sum hmanga siam len Paris St-Germain ten Real Madrid sum hi it tham a ni bik lo. An duh ber Champions League nomawi an la chawi loh avangin an player ṭha hi chhuahtir ngawt an phal lo, theih ni se hun rei zawk atan chelh an duh ang.

Kum 22 mi Mbappe chuan, "Club-in vawi sarih ngawt contract an zawrh a, a pawm duh lo, tia min sawina hi chu a dik lo. Indawrna chu a awm ngei a, mahse a hlawhtling rih lo mai zawk a ni. Media lamin an ziah zawng zawng hi a dik vek lo.

"PSG hian thil ṭha tam tak min tihsak tawh a, kan in zah tawn hle. Hlim lohna ka nei hran lo, season li ka hman liam tawhah khan ka hlim em em a, tunah pawh ka hlim. Ka chhuah duh thu ka sawi pawh khan club lamin cham tura min ti a nih chuan ka cham ang tiin ka sawi," a ti.

Chhuak loin a cham ta ngei a, league match kua aṭangin goal li a khung leh tawh. Mbappe chuan, "Tun season ka inkhel hi in en a nih chuan, ka chhuah loh avanga ti ṭha duh lo leh rilru pe lo ka nihzia chu in hmu ang, football ka hmangaih bakah PSG hi ka zah hle," tiin a sawi.

Hello Messi
Nipui lai kha Lionel Messi leh Barcelona an inṭhen a, football khawvelin mak a ti hle. Argentina captain hian August 10 khan Paris Saint-Germain a zawm fel, season hnih chhuang atan contract a ziak a, kum khat dang atan pawhsei theih tura tih a ni bawk.

Messi an neih takah chuan PSG hian tlarhma lamah Mbappe leh Neymar te nen an dahtlar thei dawn tihna a ni a, khawvel hmuh chak a ni. Khawvel hmuh chak ang ngeiin an thlen tir mek bawk a, eng tianga sang nge an thlen dawn erawh hriat a la ni lo.

Mbappe chuan, "Euro 2020 hmain PSG tana contarct pawhsei ka duh loh thu ka tichiang tawh a, chuvangin Leo Messi rawn kal khan ka transfer chungchangah nghawng a nei hran lo, thutlukna kha vawi lehkhata siam ni loin hun rei tak ka ngaihtuah hnua tih a ni," tiin a sawi.

PSG hmatawng ṭha mi Mbappe hian Messi an neih belh tak avanga chhuah duh a ni lo a, an neih belh avanga cham leh hnuhnawh tum pawh a ni hran lo. A naupan laia a khelh châkna Real Madrid pan a châk tih chu amah pawhin a sawi lang.

Neymar kha a nikhua lo lutuk
Goal khung duh, hmingṭhat duh leh hlawhtlinna chan duh vek an ni a. Manager tam takin player ṭha rual enkawl hi an harsat ṭhin. Lionel Messi, Neymar leh Kylian Mbappe te khelh dan tur duangtu nih hi a harsa dawn.
September 26, Pathianni khan PSG hian Montpellier an mikhual a, minute 88-naah Mbappe hi thlak a ni - khelmual a chhuahsan hnuah a lawm lo tih a lang a, a lawm loh chhan hi hun remchang a hmuh turah Neymar-a'n ball a pass duh loh vang a ni.

Khelmual pawnah Mbappe hian, "Nikhua lo lutuk, min pass duh lo ziah mai," tiin a sawi. Tun hnaiah Mbappe chuan he thu hi a sawi ngei em tih zawhna chhangin, "Aw, ka sawi ngei. Football-ah chuan hetiang thil hi chu thil thleng ṭhin pangngai a ni reng a lawm. "Neymar hi player a nihna leh a mihring mihrinna pawh ka zah hle. Khelmual chhung leh pawnah thil a thleng fo a, tunlaiah chuan hmun tinah camera a awm avangin a darh hluai mai zel," tiin Neymar nen an inkar chu thil pangngai mai a nih thu a sawi.

Messi leh Mbappe
Lionel Messi-a'n PSG a pan khan Mbappe hi a lawm lo tia sawi a awm, mahse Mbappe chuan Messi nen an chungchang media lama darh pawh thu belhchian dawl lo leh puarpawleng mai a nih thu a sawi.
Manchester City nen Champions League an khelh ṭumin Messi-a'n goal mawi a khung, a siamsaktu chu Mbappe a ni. Barcelona captain hluiin thui tak ball a tlanpui tawh chu box bulah lo one-two zeuhin goal an khung.

Mbappe chuan, "Messi bula khelh chu a awlsam, football kalphung engkim hre sa vek a ni a, tih tur a hre vek. Ball khalh chunga goal khung hun a hria a, midang nena inpek kual hun a hre bawk, khawvela ṭha ber a nih loh pawhin a ṭha berte zinga mi chu a ni," a ti.

Tun season chhung chu Messi, Neymar leh Mbappe an inkawp tlang hmel a, Ligue 1 chauh ni loin European team zingah pawh a hmuhnawm leh hlauhawm berte zinga mi an ni dawn tih chu a chiang.