Nations League semifinal ; Zaninah Belgium Vs France
Zanin dar 12:15 hian Belgium leh France ten Juventus Stadium, Turin-ah Nations League semifinal an khel dawn. Nizan khan Italy leh Spain ten semifinal hmasa zawk an khel tawh a, result kan hre hman lo. Pathianni zan hian San Siro, Milan-ah final khelh a ni ang.
Nations League chu
Nations League hi UEFA hnuaia inelna thar a ni a, champion hmasa ber chu Portugal niin kum 2019 khan Netherlands hnehin an champion. Inelna thar hi beisei anga a hlawhtlin loh avangin ngaihven a hlawh tawk lo a, football ngainatu zingah pawh an khelh dan phung hre mumal lo an ṭhahnem hle.
UEFA hnuaia inelna Nations League hi September 6, 2018 aṭanga khelh ṭan kha a ni a, ram inelnain ngaihven a hlawh tawk loh avangin friendly match thlakna atana siam a ni a, a tawi zawng chuan friendly match u awrh a ni.
Season hmasa ber kha September 6 - November 20, 2018 chhungin league phase khelh a ni a, finals hi June 5-9, 2019-ah khelh a ni thung. Season hnihna hi September 3 - November 18, 2020 khan league phase khelh a ni a, finals hi October 6-10, 2021 hian khelh a ni dawn.
Semifinal kalkawng
Finals-ah hian semifinal bakah final leh third place khelh tur a awm. Tun ṭum finals hi Italy-in a thleng. League phase bikah Europe ram 55 chu an ṭhat dan a zirin League A, B, C leh D-ah ṭhendarh an ni a, League A aṭang chauhin finals a thlen theih.
Belgium hi Denmark, England leh Iceland nen group khatah an awm. Red Devils hian England vawi khat an hneh lo a, a bak match ngaah erawh hnehna an chang vek. He group aṭang hian point hmu lo Iceland an relegate.
France hi Portugal, Croatia leh Sweden te nen group khatah an awm a, champion lai Portugal nen ṭum khat an inhnehtawk tih lo chu an chak vek. Les Bleus hian hneh loh an tawng lo a, Sweden erawh vawi khat chauh an chak avangin an relegate thung.
Beisei pha lo
Euro 2020-ah Belgium leh France ten beisei an pha lo ve ve. Red Devils-in quarterfinal-ah champion zui ta Italy an hneh lo a, France phei chu round of 16-ah Switzerland hneh loin an tla.
Chutihrualin FIFA ranking-ah erawh Belgium hi pakhatna an la ni reng a, France hi palinaah an awm bawk avangin ram ṭha pahnih hi an ṭha ve ve tih chu a chiang. Red Devils hian squad-ah Dries Mertens, Christian Benteke leh Divock Origi te an tel lo a, chutihrualin Club Brugge rawlthar duhawm Charles De Ketelaere a tel thung.
De Ketelaere leh Brighton forward Leandro Trossard ten ram tana khelh beiseina nei turin club tan a che ṭha a, Roberto Martinez erawhin a rinsa Kevin De Bruyne, Eden Hazard leh Romelu Lukaku te hmang bawkin bul a ṭan a rinawm.
France lamin N'Golo Kante an chhawr thei dawn lo a, Didier Deschamps tan Paul Pogba kawppui tur thlan thiam a har dawn. Inkhel bul ṭan tur zingah Adrien Rabiot leh Aurelien Tchouameni te an awm a nih pawhin a mak lo a, tlarhmaah Antoine Griezmann, Kylian Mbappe leh Karim Benzema te an awm thei a, Belgium ang thoa player an neih ṭhat avangin inkhel a hmuhnawm khawp ang.