Manchester United neituten share an zuar

Premier League club Manchester United neitute chuan club-a an share, unit maktaduai 9.5, pound maktaduai 137.12 hu hlutna nei chu hralh tumin an zuar mek.

United thuneitute chuan New York Stock Exchange chu Thawhlehni zan khan an share hralh ṭhen an duh thu hi an hrilh a, heng share-te hi club director pahnih Kevin Glazer leh Edward Glazer hmingin an zuar dawn a ni.

Red Devils chuan thu-chhuah siamin, share an hralh aṭanga sum hmuh chu club-in a dawn loh tur thu an sawi a, an hralh thei a nih chuan an share hralh zat hi Glazer chhungkuain club-a share an neih aṭanga 8% vel a ni dawn a, heti chung hian 69% share erawh an la nei pha tho ang.

March thla khan Avram Glazer chuan United-a a share neih, unit maktaduai nga chu a lo hralh tawh a, a share hralh hlut zawng hi pound maktaduai 72.5 bawr vel nia sawi a ni.

Manchester United neitu Glazer chhungkaw chungah hian United fan-te chuan vawi tam an lungawi lohna an lo lantir tawh ṭhin a, European Super League-a tel tuma hma latu langsar zinga an tel phei kha chuan fans tam takin club khelmualah an lungawi lohna an lantir.

Hetihrual hian transfer bazar-ah Glazer chhungkua an insum ngai hran lo a, season ṭan dawnah pawh khan Jadon Sancho, Raphaël Varane leh Cristiano Ronaldo neiin an thawm a na hle.

Mahse, khelmual chhungah erawh an thawm nat ang hi an lantir thei rih lo a, Premier League table-ah palina ni mekin Champions League-a an group-ah pathumna an ni mek bawk.