Qatar-a zin pha tur a hriat ṭan dawn

FIFA World Cup qualifier chu a hmawr bawkna a hnai ṭan ta a, tun ṭum international break-ah match hnih khelh a ni dawn. November thlaah match hnih dang an khel leh ang a, Europe aṭanga World Cup khel tur 13 zinga 10 chu a hriat theih tawh dawn a ni.

Quota awm dan
World Cup-ah hian ram 32 an tel ṭhin a, inelna thlengtu chiah an tling nghal. WC 2022-ah hian Qatar an tling sa a, champion lai France erawhin nomawi humhim turin qualifier aṭanga an ṭan a ngai thung.

Khawmualpui hrang hrang quota neih zat a inang lo thluah. Football team ram tamna Europe-in quota 13 an nei a, 40.62% ngawt an thawh tihna a ni. Africa ramin panga an thawh a, Europe dawta thawh tam ber an ni.

Asia leh South America ten quota 4/5 an nei a, CONCACAF (North, Central America and Caribbean) lamin 3/4 an nei a, Oceania-in 0/1 an nei ve bawk. Asia, South America, North America leh Oceania aṭanga ram pakhat ṭheuhin playoff khel tur ram pakhat ṭheuh an thawh thei tihna a ni a, double legged hmangin World Cup khel tur an zawng ṭhin.

Europe chu
Quota ngah ber Europe-ah hian ram 55 an awm a, group 10-ah ṭhendarh an ni. Group tin aṭanga a sang ber ṭheuh an tling nghal a, hmunruak pathum hi playoff hmangin a khel tur an zawng ang.

Playoff khelh dan hmang hi a dang hret. Group tina pahnihna bakah hian Nations League-a mahni group-a pakhatna ni si a, World Cup khel tura tling zo si lo zinga ti ṭha pahnih an tel dawn. Playoff-a pahnihna nen ram 12 an ni chiah ang.

Ram 12 hi hmun (path) thumah pali zelin an ṭhendarh ang a, path tin hian semifinal leh final hmangin World Cup khel tur an zawng dawn a ni.

Tun dinhmun chu
Group A-ah Portugal-in hma an hruai a, point 13 hmu tawhin Luxembourg, Republic of Ireland leh Serbia te an la hmachhawn dawn. Cristiano Ronaldo telna team hian match tawp berah Serbia hi an hmachhawn dawn a, an inthlauhna hi point hnih chauh a nih avangin an dinhmun a la chiang bik lo.

Group B-ah Spain-in point 13 an hmu tawh a, pahnihna Sweden aiin point liin hmu tam mah se match hnihin an khel tam. La Roja dinhmun a him lo a, Sweden nen hian match tawp berah an inkhel dawn.

Group C-ah Italy-in point 14 an hmu tawh a, Azzurri hi Switzerland-in an la tibuai pha. Nati (Switzerland) hian point riat an hmu a, an match khelh hmabaka an chak vek chuan Qatar-ah an zin dawn. Chutihrualin Italy leh Switzerland hi November thlaah an la inkhel ang.

Group D, E leh F aṭangin France (12 pts), Belgium (16 pts) leh Denmark (18 pts) te an tlin ngei a rinawm. Group G erawh a la chiang lo, Netherlands, Erling Haaland-a telna Norway leh Turkey ten beisei an la nei vek.

Netherlands leh Norway te hian tunah hian point 13 ve ve an hmu mek a, match tawp berah an la inkhel dawn bawk. Oranje hian Euro 2016 leh World Cup 2018 an khel tawh lo a, Louis van Gaal hnuaiah World Cup khelh ngei an tum dawn a ni.

Group H-ah Croatia leh Russia ten point 13 ve ve an hmu a, ram pahnih hi match hnuhnung berah an la inkhel dawn. Group I-ah England (16 pts) tan hna harsa tur awmin a lang lo a, Poland erawhin point 11 chiah an la hmuh avangin Qatar-ah Robert Lewandowski a inlan lo thei tlat. Group J aṭangin Germany dinhmun a ṭha tawh bawk.