Paraguay-in Messi dan an tum dawn

Zirtawpni zing dar 4:30 hian Paraguay chuan World Cup qualifier khel turin Argentina an mikhual dawn. Paraguay manager Eduardo Berizzo chuan Lionel Messi dan an tum thu a sawi a, a khelh dan an lo zir chiang tih a sawi bawk.

Messi awmna La Albiceleste hi table-ah pahnihna an ni mek, player an neih dan chhut chuan Paraguay hi team ṭha lo zawk an ni. Mahse, Berizzo naute hi an muala khel tur an nih avangin an zam bik lo.

Paraguay manager Berizzo chuan, "Messi kan hmachhawn dawn a nih chuan ngun taka kan lo inzir hmasak a ngai. Ani dang tur chuan amah ven ringawt a tawk dawn lo, amah ball pass thei turte pawh kan ven tel vek a ngai dawn.

"Uluk takin Leo chu kan veng ngei ang, chutih rualin hmun ruak siamsak miah loh a ngai dawn. Ball a keng thei a, thui tak pawh a tlanpui thei, kawng engkimah kan fimkhur a ngai tihna a ni," tiin a sawi.

Kum 34 mi Messi hian ram tan match 153 a khelh aṭangin goal 79 a khung tawh. South American player zingah chuan ram tana goal khung hnem ber a ni, record rei tak lo chelh tawhtu Pele (77 goals) chu a khum tawh a ni.

World Cup Qualifier Fixtures
October 8, Zirtawpni
Paraguay 04:30 AM Argentina
Uruguay 04:30 AM Colombia
Venezuela 05:00 AM Brazil
Ecuador 06:00 AM Bolivia
Peru 06:30 AM Chile