Champion lai Mumbai tan beiseina thar

Indian Premier League cham-pion lai Mumbai Indians chuan Thawhlehni zan khan playoff khel tura an elpui Rajasthan Royals chu wicket riatin an sawp. Mumbai leh Kolkata Knight Riders ten match khat khelh hmabak la awmah point 12 an hmu mek a, hmunruak pakhat la awm hi an inchuh dawn.

Sharjah Cricket Stadium-a inkhelah hian Mumbai-in vawm hmasak an thlang a, thutlukna an siam fuh hle. Mumbai bowler-te an che ṭha a, Nathan Coulter-Nile-a'n 14 runs chauh pein wicket li a la. James Neesham-a'n wicket thum lain 12 runs chauh a pe a, India chhuanvawr Jasprit Bumrah pawhin 14 runs pein wicket hnih a la ve bawk.

Rajasthan Royals-in over 20-ah 90/9 runs chauh an siam a, 24 runs vaw chhuaktu opener Evin Lewis chu run siam tam ber a ni. Mumbai tan opener Ishan Kishan chuan thi loin ball 25 lekah 50 runs a siam a, Rohit Sharma-a'n 22 runs siam ve bawkin 8.2 overs lekah 94/2 runs siamin target an umpha.

Mumbai Indians hian match 13 aṭangin point 12 an hlawh chhuak a, match tawp berah tla tawh Sunrisers Hyderabad an hmachhawn dawn. Chutihrualin Mumbai hian net run rate-ah Kolkata Knight Riders an pha lo a, KKR hian zanin dar 7:30 hian Rajasthan Royals an hmachhawn dawn. Kolkata club hian hnehna an chang a nih chuan Mumbai tan playoff khelh a har ṭalh tawh ang.