Emma Raducanu a inpeih

US Open a champion hnuah chawlh kar thum a liam leh ta a, tunah chuan tournament khel turin Emma Raducanu a inpeih leh ta - tun kar tawp aṭanga khelh tur Indian Wells-ah a inlan ang.

Kum 18 mi Raducanu chuan, "Kar thum nuam leh hlimawm tak a ni, lawmpuina leh duhsakna ka dawn hnem avangin ka hun hman dan pawh a danglam ta hle. Mahse, ka training tibuai thei thil erawh ka ti duh lo.

"A bul ka ṭan ve chauh a ni a, a chheh vela ka buai lutuk a nih chuan ka tan a pawi thei. Chuvangin tennis ka ngai pawimawh ber a, a dawtah thil dang chu ka dah chauh zawk," tiin a sawi.

British tleirawl hian qualifying paltlang chungin US Open nomawi a chawi a nih kha, inelna lian Grand Slam huangah chuan a tih ang ti thei kha an la awm ngai lo. Indian Wells-ah chuan wildcard pek a nih avangin qualifying a khelh a ngai dawn lo.

Raducanu hi a coach Andrew Richardson nen an thawhdunna a tawp tawh a, a coach nen an inṭhen vang hian buaina leh harsatna a neih loh a beisei thu a sawi bawk.