Chelsea hmaah Champions League Huddersfield hmaah Relegation

Premier League hmawr bawk a hnai a, hma takah Manchester City champion mah se Champions League leh relegation battle boruak a hot chho zel a, Premier League a ngaihnawm zel.

Zanin dar 12:15-ah Chelsea chuan Huddersfield an mikhual dawn a, team pahnih tan he inkhel hi an hma hun thui taka hriltu tur a ni. Chelsea-in hnehna an chang zo lo a nih chuan Champions League khelh an beiseina a chuai ang a, Huddersfield tan him turin hnehna chan a ṭul bawk.

Tottenham Hotspur dinhmun a him bik lo. London club hian season tharah Champions League khelh an duh a nih chuan zanin dar 12:30-a Newcastle United an mikhual hunah tlawm a thiang dawn lo - hnehna an chang zo lo a nih chuan an dinhmun a derthawng sawt ang.

Beiseina nen Chelsea
Mihringin a neih theih hlu ber zinga mi chu beiseina a ni a, chu beiseina nen chuan a hmaa inchhawp huaisen takin a hmachhawn ṭhin - Chelsea manager Antonio Conte-a'n beiseina an neih leh tawh thu a sawi a, hei hi Huddersfield tan thu hriat nuam tur a ni lo.

Italian manager hian 1-0 a Liverpool an hneh hnu lawkah, "Tunah chuan beiseina nen kan nung thar leh ta," a ti a, "Bei zel tura kan thawhrimna leh duhnaah kan lawm tur a ni a, Champions League khelh duhna thinlung kan neih hi a ropui em em bawk," tiin a phur hle.

Blues-in thu lawmawm dang an nei a, hliam vanga Liverpool hmachhawn thei lo Alvaro Morata-a'n dam lam a pan a, Huddersfield mikhual thei tura beisei a ni. Blues hian Premier League match li chhung chu a zawnin hnehna an chang tawh.

A awlsam dawn lo
Tun hnaia West Brom result thlirin tlak hlau team hlauhawm zia chiang takin a lang a, Huddersfield thawnthu a danglam bik lo. Season hmasaa Championship aṭanga inpetkai team hian him chiang turin point thum an mamawh.

Huddersfield tan Stamford Bridge-a point thum hlawhchhuah hi theih loh a ni lo - Etihad Stadium-ah Manchester City chu goal khung loin an inhnehtawkpui a, he team hian mipui an barakhaih. Thatho zawkin Chelsea an lenchilh ang.

Terriers (Huddersfield sawin) defender Scott Malone chuan, "Manchester City ai khan a awlsam zawk ka ring a, Etihad Stadium-a kan rinna leh beiseina ang khan kan khelh leh a pawimawh a ni. Man City laka kan khelh dan khan inrintawkna min pe a, final pahnih khelh tur kan la nei," a ti. Chelsea zawhah hian Arsenal an hmachhawn leh ang.

Spurs an him lo
Tottenham-in an match hnuhnung berah an hneh tura ngaih West Brom chu 1-0 in an ngam lo a, season thara Champions League khel tura an dinhmun a him loh phah - table-ah palina ni mekin match hnih khelh tur an la nei a, match khata khel tam chungin pathumna Liverpool chu point khatin an phak lo a, Chelsea nen khelh zat in anga an san zawkna chu point hnih chiah a ni bawk.

Newcastle United-in season tharah Premier League an khelh chhunzawm dawn chiang tawh a, hei vanga inthlahdah tur team erawh an ni lo. Rafael Benitez-a naute hian table-ah 10-na dinhmun an luah mek a, an match hnuhnung pali-ah an chak lo vek!

Magpies-in Spurs zawhah an match hnuhnung berah Chelsea an mikhual leh dawn bawk a, a awlsam dawn lo. Hei vang tak hian mualpho taka season an khar loh nan Spurs lakah hnehna chan ngei an duh ang - an match hnuhnung pahnihah an chak chuan Benitez-a 'hmangaih hmasa' Liverpool tan hna ṭha tak an thawh sak tel dawn tihna a ni a, hmingṭha takin season an khar bawk ang.

Ṭha tak zelin le...
Spurs-in 1-0 a Baggies an ngam loh hnuah boss Mauricio Pochettino a lungawi lo a, Argentine manager hian chhuanlam a zawng lo - zanina Magpies an hmachhawn hun atan erawh a nauten an theihna zawng zawng an chhuah a beisei a, a sang pali zinga tel loin season an khar ang tih a hlau.

Kum 46 mi manager chuan, "Match hnih khelh tur kan la nei a, ṭha takin kan hna kan hlen thei tih hi kan pholan a ṭul. Inrintawkna kan neih a pawimawh a, a ṭha thei ang bera season khar turin kan inring tur a ni," a ti a, Magpies lakah tih hni hne a tum lo.

Spurs captain Hugo Lloris pawhin a ṭhiante chu in thing harh turin a fuih. French goalkeeper chuan, "Kan hmabak match hnih hi club leh keimahni tan ngei pawh a pawimawh a ni. A tawp thlengin a harsa dawn tih hi kan pawm tur a ni a, Premier League-ah kan awm tih hi kan hai a thiang lo. A sang pali zinga tel tura kan elpui hi Liverpool leh Chelsea an ni tih hi kan theihnghilh loh ka duh a ni," tiin a sawi.