Mizoram tan beisei tur a la awm

Mizoram Basketball Junior Team chuan an match hmasa berah West Bengal hneh mah se nimin tlaia Karnataka an hneh loh avangin 69th National Junior Tournament Championship-a stage sang thleng lut turin an dinhmun a ṭha lo a, beisei tur erawh a la awm.

Guru Nanak Stadium, Ludhiana a inelna neihah Mizoram hian May 7 zan khan West Bengal chu 67-60 in an hneh a, nimin tlai khan Karnataka chu 85-83 in an hneh lo. Vawiin tlai dar 3:30 hian match hnuhnung berah chak la nei lo Andhra Pradesh an hmachhawn ang.

Bul ṭan ṭha
Mizoram leh West Bengal hian 'outdoor' ah an khel a, Mizo rawltharten san lamah pha lo mah se an chet ranna leh thiamna hmang ṭangkaiin an chungnung zawk.

West Bengal-in 'Zone Defence' hmangin an lenna hman ṭangkai an tum a, Mizo player-ten shooting a an ṭhatna an hmang ṭangkai thung. Team captain leh MSL4 MVP Zonunsanga chuan point 20 zet a nei a, MSL4-a Hollow BBSP player pawimawh Ronald Zomuanpuia che ṭhain point 18 a nei ve bawk.

Hun tawp lamah foul trouble vangin Mizoram talbuai mah se an ṭang tluan a, 67-60 in hnehna an chang.

An vanduai
Karnataka lakah Mizoramin bul an ṭan ṭha a, halftime-ah pawh 48-37 in hma an hruai. Third quarter-ah Karnataka lamin an lehthal a, 63-62 a ni a. Mizoramin fourth quarter-ah nawr let mah se Karnataka an vannei ta zawk a, 85-83 in hnehna an chang.

Mizoram coach Samuel Lalthlamuana chuan, "Chak thei kan ni a, a tawpah kan tihsual vangin kan chak lo. West Bengal nen khan outdoor-ah kan khel a, a chhuat a thap ṭhat avangin kan ranna kan hmang thei a. Karnataka nen hian indoor-ah kan khel a, a nal hret avangin kan tan a harsa deuh a ni," tiin Vanglaini a hrilh a, beisei tur a la awm thu a sawi tel bawk.

Group khat aṭangin a sang ber stage sang zawk an lut dawn a, Mizoram hian he round lut tur hian Andhra Pradesh an hneh bakah West Bengal-in Karnataka an hneh sak a ṭul bawk ang.