Nishikori hnehtu Novak Djokovic

Player lian leh langsar laka che fuh hleithei lo Novak Djokovic chuan Kei Nishikori a hneh a, kum khat deuhthaw hnuah world number 20 chin player lakah chak ni hmel a hmu ve leh ta.

Thawhṭanni zan Madrid Open inkhelah world number 1 hlui Djokovic-a'n 7-5, 6-4 in hnehna a chang a, hnehna chang tur hian darkar hnih a hmang tling lo deuh.

Serbian tlangval Djokovic-a'n a kiu na zai a nih hnuah tournament panga a khel tawh a, quarterfinal a lut phak lo vek. A match lehpekah Kyle Edmund a hmachhawn dawn a, Britain tlangval Edmund hi awlsam taka paltlang theih tur a ni lo mai thei.

Grand Slam vawi 12 champion tawh Djokovic chuan, "Inrintawkna ka neih lehna tura thil pawimawh tak a ni. Hun rei tak aṭang khan hetiang inkhel hautaka hnehna ka chan hun tur hi ka lo thlir reng tawh a, tunah chuan a takin a thleng dik ve leh ta," tiin a sawi.

Kum 30 mi Djokovic hi April thla khan a coach Andre Agassi nen an inṭhen a, tun hma lama a ropui tawh ṭhinna ang kha a nei let thei rih lo. A service leh backhand na tak hmuh tur a la tam lo a, chutihrualin winners vawi 26 a vuak theih avangin Monte Carlo Masters leh Barcelona Open a khelh ai chuan hmasawnna tam tak a nei.

Djokovic-a hneh tak Nishikori pawh chak lo mah se, thla ruk chhung hliam vanga a chawlh hnua rawn kir hlim ve bawk a nih avangin court chhunga a chet dan a chhe lo - thla hmasa mai khan Monter Carlo Masters final-ah Rafael Nadal a ngam lo a ni.

Inkhel dangah world number 24 Milos Raonic chuan Nicolas Kicker lakah 6-3, 6-2 in hnehna a chang a, second round-ah chuan seeded pathumna Grigor Dimitrov nen an inkhel leh ang. Diego Schwartzman, Feliciano Lopez, Benoit Paire leh Gael Monfils te pawhin hnehna an chang vek.