Cavs leh LeBron te an vul

LeBron James-a'n point 29 a nei a, Cleveland Cavaliers-in nimin zing khan Toronto Raptors 128-93 in an hneh a, 4-0 a series lain NBA Eastern Conference finals an thleng.

Semifinal dangah Philadelphia 76ers-in beiseina chhi nung turin Boston Celtics 103-92 in an hneh a, Celtics-in 3-1 in hma an la hruai chhunzawm thung. Game 5 hi May 10 zing dar 5:30 hian TD Garden-ah an khel leh ang.

Vawi thum
Raptors hian Eastern Conference-ah seeded number 1 niin playoff an thleng a, an hneh loh erawh Cavaliers bawk a ni. Cavs hian playoff hnuhnung pathumah Toronto hi an hmachhawn vek a, an hneh vek bawk.

Cavs star James chuan, "Kan hmaah thil khirh tak tak paltlang tur a awm a, amaherawhchu chumi hmachhawn tur chuan ruahmanna kan nei ṭha a ni," tiin inbuatsaihna an neih ṭhat thu a sawi.

James hian game 3-ah buzzer beat-in Cavaliers chu 105-103 in hnehna a chanpui a, game 4-ah erawh langsar bik lo mah se double-double nei thoin point 29 a neih bakah hian asssist vawi 11 a nei a ni. Cavs tan hian LeBron bakah Kevin Love (23 pts), Kyle Korver (16), JR Smith (15) leh George Hill (12) te an che ṭha bawk.

Toronto coach Dwane Casey chuan, "Kan thawhleh theih hi ka beisei a, amaherawhchu ka beisei ang a thleng lo," tiin a nauten an theihna anga an khelh loh thu a sawi.

West lam..
Tukin dar 8:00 hian Game 5-ah Golden State Warriors chuan New Orleans Pelicans an hmachhawn dawn a, Stephen Curry hote hian hnena an chang a nih chuan final an lut ang.

Zing dar 5:30-ah Houston Rockets leh Utah Jazz ten Game 5 an khel dawn bawk a, Rockets hian 3-1 in hma an hruai mek.