Aizawl FC U18 an chak vek

Aizawl FC Under 18 team te chuan nimin khan Tata Football Academy chu 2-0 in an hneh a, Youth League Under 18-ah an khingpui an hneh vek a, Rest of India Zone Group A hmahruaitu nichungin playoff an khel dawn.

Nimina JN Stadium, Shillong-a inkhelah hian Aizawl FC Under 18 tan David Lalhlansanga chuan minute 56-naah goal hmahruai a khung a, C. Lalremliana'n minute 77-naah goal hnihna a khung belh leh bawk.

Mizo club hian TFA an hneh hma hian Fateh Hyderabad (5-1), Neroca (3-0), Ananthapur Sports (8-0) leh Sports Hostel Odhisa (2-0) te an hneh a. An group aṭang hian pahnihna TFA hi playoff khel turin an tling ve bawk.

Playoff hi Shillong-ah May 10, 12 leh 14 hian khelh chhunzawm a ni dawn a, Aizawl FC Under 18 hi Group A-ah MSP Football Academy, SAG FC leh Minerva Punjab te an awm. Team manager H. Lalnunzira chuan, "Kan khelh dan a lungawi thlak khawp mai, coach Nicky pawh a lawm khawpin ka hria. Match nga kan khelhah hian kan chak vek a ni ringawt lo a, goal 20 khungin goal khat chiah kan chhuah," tiin Vanglaini a hrilh.