Arsenal tan manager thar a hnai

Arsene Wenger hmunruak luah tur la chiang lo mah se, Arsenal chuan June 14 aṭanga khelh tur World Cup hma ngeiin an manager thar tur an puan chian hman an beisei.

French manager Wenger-a'n kum 22 deuhthaw a kaihhruai tawh Arsenal hi match hnih chiah a enkawl tawh dawn a, zanin dar 12:15 hian Leicester City an lenchilh ang a, a hnuhnung ber atan Pathianni zanah Huddersfield an tlawh bawk ang. Wenger-a naute hi Premier League-ah parukna an ni chiang tawh a, season tharah Europa League an khel ang.

Gunners enkawl tura a hming an lam rik langsar chu Barcelona coach hlui Luis Enrique leh Juventus boss Massimiliano Allegri te an ni a, Spanish leh Italian manager te hian North London kalphung neih sa an zui thei dawn em tih chu buaina an neih niin a lang.

Kum 48 mi Enrique hi team enkawl lai nei lo a ni a, sum an seng huai a nih chuan lak theih tur a ni. Allegri-a'n a zawna a vawi li nan Juventus chu Serie A nomawi a chawipui teuh tawh hle, Turin club tan kum hnih daih contract nei lai a nih avangin, ani la chhuak tur chuan a hlawh bakah player lak nan sum sen huai a ngai ang tih a rin theih.

Arsenal hian nikum khan Raul Sanllehi (head of football relations) leh Sven Mislintat (head of recruitment) te an ruat thar a, an manager thar chuan anni pahnih hi an thawhpui ang.

Gunners captain hlui Mikel Arteta leh Patrick Vieira te chu anmahni kaihruai tawhtu thlak tura sawi rik zingah an tel a, Monaco manager Leonardo Jardim leh Champions League vawi thum champion tawh Carlo Ancelotti te pawh Wenger thlak thei an ni.