Azarenka hnehtu Pliskova

Madrid Open khelh mekah world number 6 Karolina Pliskova chuan Victoria Azarenka hnehin harsa takin third round a lut a, Caroline Wozniacki leh Maria Sharapova te pawhin an khingpui an hneh ve bawk.

Thawhṭanni zan inkhelah kum 26 mi Pliskova-i'n set hmasa ber la mah se, set hnihnaah a zawna game nga ngawt a hloh avangin set a chan a, a chak zawk tur chinfelna set hnuhnung berah erawh vannei zawkin 6-2, 1-6, 7-5 in hnehna a chang.

Czech Republic nula Pliskova hian kar hmasa mai khan Stuttgart Open nomawi a chawi a, tun hnaiah a khel ṭha tluang rih hle. A match lehpekah chuan Samantha Stosur 6-1, 6-3 a hnehtu Sloane Stephens nen an inhmachhawn leh dawn a ni.

Grand Slam vawi hnih champion tawh Azarenka-i'n a fapa enkawl a ngaih avangin kum tir lamah match ṭhenkhat a khel thei lo a, May thla tawp lama khelh tur French Open inbuatsaih nan karleh hian Italian Open a khel zui ang.

Inkhel dangah world number 2 Caroline Wozniacki chuan Ashleigh Barty 6-2, 4-6, 6-4 in a hneh a, Australian Open champion hi deciding-ah 4-2 in a hnufual hman a, mah se game li la zawnin hnehna a chang–Dutch player Kiki Bertens nen an intum leh dawn.

World number 1 hlui Sharapova pawhin quarterfinal a hnaih zel. Russian star hian Irina-Camelia Begu lakah 7-5, 6-1 in hnehna a chang. Bernarda Pera, Julia Goerges leh Caroline Garcia te pawhin hnehna an chang bawk.