Villarreal-in Barca chungah zahna lantir dawn
Real Madrid-in El Clasico-ah La Liga champion Barcelona hnenah guard of honour an pe duh lo a, Villarreal erawhin tlai hnuhnawhah zahna an lantir dawn thung. Yellow Submarine hian zanin dar 11:30 hian Nou Camp an tlawh ang a, La Liga champion Barca player-ten khelmual an rawn luh laiin zahna lantir nan an lo intlar ang.
Los Blancos pawhin zanin dar 1:00 hian Sevilla hmachhawn turin Ramon Sanchez Pizjuan an tlawh ang. Zanin inkhel pahnih khelh zawh hian La Liga club-ten match 36 ṭheuh an khel tawh ang a, match hnih chiah khelh tur a awm tawh dawn.
Europa League khelh duh
Villarreal hian Barcelona hi 2015 Club World Cup an champion zawhah guard of honour an lo pe tawh a, tun hma aṭanga kalphung ngheta an neih tawh hi chhawm nun zel an tum.
Barca-in pakhatna dinhmun an nemnghet tawh a, Yellow Submarine hian Europa League khel turin an dinhmun sawhngheh an tum thung ang. Tunah hian Villarreal hian point 57 an hmu a, an chunga awm Real Betis hnungzuiin Europa League an khelh ngei a rinawm.
Real Madrid hmachhawn tur Sevilla erawh pariatnaah an awm mek a, an chunga awm Getafe an phak lohna chu point khat a ni. La Liga match sarih chhung chak hmel an hmuh loh avangin coach Vincenzo Montella chu an ban a, manager lailawk Joaquín Caparros hnuaia an match hmasa berah Real Sociedad 1-0 in an hneh.
Europa League khelh tum pahnih Villarreal leh Sevilla tan ṭan chhan tur a awm ang.
Invincible?
Barcelona hian tun season league match 35 an khelh tawhah chak loh an la nei lo a, vawi 26 chak tawhin match kua an inhnehtawk.
Catalan club hian Villarreal bakah Levante leh Real Sociedad an la hmachhawn dawn a, Ernesto Valverde hnuaiah hneh loh tawng loin season an hman tluan ngei a rinawm. La Liga leh Copa del Rey-ah an champion tawh a, an khelh chhan awmchhun chu record chiah a ni tawh a, Yellow Submarine lakah chetsual an tum lo ang.
Hahdam hun
Real Madrid-in May 26 zanah Liverpool nen Champions League final an khel dawn a, Europe-a kum thum a zawna champion turin La Liga lamah chuan indahṭhat a pawimawh ṭan ang.
Zinedine Zidane hian tun season-ah Castilla (reserve team) player a la chhawr lo. 2007-08 season-a La Liga-a an champion khan Bernd Schuster chuan reserve team player a khelhtir tawh lo a, hemi hnu hi chuan reserve team player an la hmang ziah.
Real boss chuan midfielder Cesar Gelabert chu first team zinga training turin a ko a, Thawhṭanni khan Spanish rawlthar hian training hmasa ber hi a nei a, Sevilla lakah hian Los Blancos tana a match hmasa ber khel thei dinhmunah a ding.