Queen's 2018-ah player an hrawl dawn
Wimbledon inbuatsaih nana an hman ṭhin tournament zinga pakhat 2018 Queen's Club Championship-ah player tel an langsar dawn hle, world number 1 Rafael Nadal chu mipui mit fukna tur a ni dawn.
World number 10 chin zinga player paruk - Nadal, Grigor Dimitrov, Marin Cilic, Juan Martin del Potro, Kevin Anderson leh David Goffin te an inlan dawn tih a chiang tawh a, Wimbledon vawi hnih champion tawh Andy Murray pawh a hliam a dam a nih chuan inlan ngei tura ngaih a ni.
Inelna hi June 18-24 chhunga khelh tur a ni a, vawi nga champion tawh Murray hi khel bawr na vangin a chawl mek. Vawi nga a champion tawhna hmunah hian a inlan a nih chuan player dang ṭha tak ho tan pawha hnawksak tling thei tur a ni ang. Tun hnaiah champion lai Feliciano Lopez bakah Stan Wawrinka, Milos Raonic, Tomas Berdych leh Jo-Wilfried Tsonga te pawhin hming an pe lut tawh bawk.
Tournament director Stephen Farrow chuan, "A sang 10 zinga paruk an rawn inlan tur hi kan tan chuan a hlu hle a, anni bakah Andy Murray, Stan Wawrinka, Milos Raonic, Feliciano Lopez leh Nick Kyrgios te pawh player hmuhnawm leh mipui ṭan hlawh vek an nih avangin kum dang zawng aiin inelna a hmuhnawm kan beisei," a ti.
Beisei angin hming ziak lut ho an inlan kim thei a nih chuan 2018 Queen's Club Championship-ah kum 128 chhunga player an inlan ṭhat ber ṭum a ni dawn a, tun dinhmunah world number 30 ching player 17 an inziak lut tawh a ni.