Saints an chak; West Brom an liam ta

Southampton chuan Premier League khelh zel an beiseina chhi nung turin Swansea City chu 1-0 in an hneh a, he result avang hian tun hnaia khel ṭha tak West Brom chuan Premier League an mangṭha a ṭul ta.

Saints goal neihchhun hi Manolo Gabbiadini khung a ni a, Italian striker goal hian Baggies beiseina a tih tawp rualin Swans dinhmun a ti derthawng tel nghal bawk–West Brom leh Stoke City chu tla chiang tawh an ni a, Swansea chu tun dinhmuna team pahnih hnung zuina chance nei sang ber an ni.

Nizan dar 12:15 khan Huddersfield chuan Chelsea an lenchilh a, he thuziak i chhiar meuh chuan Premier League kai thar dinhmun hi a chiang thuak tawh ang–him turin point khat chauh an mamawh tawh.

Saints him a hnai
January 2018 khan tlak hlau Stoke City-in coach aṭangin Mark Hughes an ban a, tlak hlau ve tho Southampton-in March 14 khan Hughes an lalut thung–Stoke-in Premier League an mangṭha fel tawh a, Saints chu him thei dinhmunah an ding mek thung.

Mauricio Pellegrino hnuaia an khelh laiin Saints hian league match 30-ah vawi nga chiah chak hmel an hmu a, vawi 12 tlawmin vawi 13 an khingpui an inhnehtawkpui. Pellegrino hoa an win percentage hi 16.7% a ni–Hughes hnuaiah league match sarih an khel tawh a, vawi hnih chakin vawi hnih an in draw a, win percentage chu 28.6-ah a chho.

Southampton hian an league match hnuhnung berah Manchester City an hmachhawn dawn a, hnehna chang zo lo ta se, Swansea-in Stoke hneh bawk se an la him thei tho–Swans nena an goal difference a inthlauh avangin goal 10 tal an chhuah a ngai ang!

Fak tlak Hughes
Mark Hughes-a'n Saints a pan hnuah player-ah phur tharna a thlen tih hai rual a ni lo a, an elpui Swans laka point thum an hlawhchhuahna kawngah pawh Welsh manager hi fak phu a ni.

Manchester United forward hlui hian an match tawp berah a lo enkawl tawh City an tum dawn tih a hria a, a harsa dawn tih a hai lo. Hei vang tak hian Swans lakah chak tumin risk a la a, minute 68-naah defender Jan Bednarek la chhuakin forward Gabbiadini a luhtir.

Minute nga hnu lawkah Hughes thutluk dikna a lang a, Italian striker hian goal awmchhun a khung nghal. Hughes chuan, "He club tan hian ka lawm a, chhiarkawp dan aṭanga chhutin la him chiang lo mah ila dinhmun ṭha takah kan awm tawh a ni," a ti.

Mangṭha Baggies
West Brom manager lailawk Darren Moore chu April-ah coach turin lakluh a ni a, match nga a enkawlah tlawm hmel a hmu miah lo–vawi thum an chak a, vawi hnih an khingpui an inhnehtawkpui.

Heng match zingah hian Manchester United, Newcastle leh Tottenham an hneh chu a tel a, Liverpool leh Swansea City an inhnehtawkpui. Kum 44 mi hi a record ṭha tak avang hian Premier League manager of the month atan thlan a ni a, Baggies chhanhim tur erawhin a tawk zo lo.

Thawhlehni zan inkhelah khan Saints leh Swansea kha inhnehtawk ni se chuan Baggies hian match tawp ber thlengin beiseina an la nei tur a ni a, tunah erawh kum riat hnua a vawi khat nan Premier League an mangṭha a ṭul ta.

Hlimni rei lo...
West Brom-in 2015-a an coach Tony Pulis hoin tun season bul an ṭan a, Premier League-a an match hmasa pahnihah hnehna chang nghalin 1978-79 season hnua bul an ṭan ṭhat ber ṭum an tawng.

Mahse, Baggies hlimni a rei lo–league match 10 chhung chak ni hmel an hmu lo zui a, November 2017 khan Pulis chu a hna aṭangin chawlhtir a ni. English football-a tawnhriat ngah tak hmun ruakah amah ang thoa tawnhriat ngah Alan Pardew an lalut.

Manager nei loa Tottenham Hotspur leh Newcastle United an inhnehtawkpui hnuah Alan Pardew-a hnuaia an match hmasa ber chu Crystal Palace nen an khel a, an inhnehtawk. Baggies-in an beisei ang result an nei zui lo a, Pardew hnuaia league match 18 an khelhah point 54 hmuh theih ni mah se point riat chiah an hlawh chhuak thei!

A tlai lua...
West Brom-in March 17-a Bournemouth an ngam loh thlengin manager Pardew an thlawpna thu an sawi reng a, mahse an duh ber result a neihpui theih miau loh avangin April 2 khan English manager hi chhuahna kawngka kawhhmuh a ni.

West Brom-in 'Big Dave' tia hriat hlawh ṭhin, an defender hlui Darren Moore chu coach turin an lalut a, thutlukna dik tak a nihzia a result-in a hrilhfiah–mahse, Baggies thutlukna siam erawh a tlai tih hai rual a ni lo a, season tawp lama che ṭha tak chung siin Premier League an mangṭha a ṭul ta.

Baggies hian match 37 an khelh tawh aṭangin point 31 chiah an hmu a, Pathianni zan khian an match hnuhnung berah Crystal Palace an lenchilh dawn–season tharah Moore hi manager nghet a nih pawhin a mak lo ang.

Zawhna chu
West Brom-in Premier League club 'vantlang' dinhmun an chelh reng ṭhin a, mi tam tak thinlunga zawhna piang chu, "Eng nge dik lo awm?" tih hi a ni a, a chhanna chu thutlukna dik tawk lo, management fel lo leh player 'inpek' tawk lohna chu a ni.

Baggies neitu, Chinese sumdawng hausa Guochuan Lai-a'n Pulis a ban hnuah February khan club chairman John Williams leh chief executive Martin Goodman a ban a, club-in an tihfuhna hmuh tur a awm lo.

Club intuai thar nan Barcelona lamah an zin a, mahse zana chhuah phal a ni lo chungin senior player rual Gareth Barry, Jonny Evans, Jake Livermore leh Boaz Myhill te chuan zu rui chungin taxi an ru a, hei hian club chhungkuaah thui takin nghawng a nei.

Beisei phak lo
Baggies buaina dang pakhat chu player-ten beisei an phak lo kha a ni. Nipui transfer-a pound maktaduai 12-a an lei Jay Rodriguez-a'n league match 33 aṭangin goal sarih chiah a khung a, Premier League season khata goal 10 aia tam la khung lo Saloman Rondon lahin goal sarih bak a la khung thei rih lo bawk.

Pardew-a'n January transfer-ah Liverpool aṭangin Daniel Sturridge chu loan-in a hawh a, Premier League match 114 inkhel bul a ṭana goal 74 khung thei striker lakluh hi Baggies tan chuan 'big signing' a ni.

Mahse, English striker hi Liverpool-a a buainain Hawthorns lamah pawh a kiansan lo–February 12-a Chelsea laka a inhliam hnuah match ruk a inlan lo zui a, Moore-a hnuaiah minute 21 chiah a la khel–Baggies tan minute 99 a khel hman ṭawk a, West Brom-in Sturridge an hawh avanga an sum sen zat chu pound maktaduai 3.8 a ni!