TT tan season thar a inṭan

10th May, 2018

Mizoram Table Tennis Association hnuaia 2018-2019 season chhunga inelna hmasa ber MTTA Season Opening Table Tennis Championship 2018 chu nimin aṭang khan MTTA Hall, Mission Vengah khelh ṭan a ni a, Sports & Youth Services director Zothanmawia chuan a vaw hawng - inelna hi May 12 thleng awh tur a ni.

Inelnaah hian Mizoram hmun hrang hrang aṭangin TT khel thiam player 145 an inlan dawn a, season khat chhunga ranking point tam pahnihna a nih avangin tel an ṭhahnem hle, champion hian point 120 hmuin, pahnihnain point 90 an hmu ang.

Tun tournament-ah hian a vawi khat nan kum 10 chin leh a hnuai lam inelna Mini Cadet category siam a ni a, hun eng emaw chen an kalpui tawh loh hmeichhe kum 35 chunglam inelna pawh category chi hrang 16 zingah telh a ni ve leh bawk.