Mizoram an chak, an tla tho

Mizoram Basketball Junior Team chuan 69th National Junior Tournament Championship-a an match hmasa berah West Bengal an hneh a, nimin khan an match hnuhnung berah Andhra Pradesh 78-73 in an hneh leh bawk. Amaherawhchu, Mizoram hian heng match pahnih karah hian Karnataka an hneh lo a, anni hian group F hmahruaitu ni turin nizan khan West Bengal chu 71-48-in an sawp a, Mizoram beiseina a tawp.

Mizoram coach Samuel Lalthlamuana chuan inelna neihna hmun Ludhiana, Punjab an pan hmain 'Level 1' thlen phak chu an tum ber a nih thu a sawi a, MSL4-a point ngah ber Ronald Zomuanpuia leh MVP Zonunsanga te an kawl avangin thil harsa hi beisei ngam a ni. Match hmasa berah Mizoram hian West Bengal hi 67-60 in an hneh nghal a, match hnihnaa Karnataka an hmachhawn ṭum pawhin hun tam zawk hmahruaitu an ni a, a tawpah an chetsual avangin 85-83 in an chak lo.

Point hniha an chak lohna nghawng a lian a, Mizoram hian match hnuhnung berah Andhra Pradesh hnehin beiseina chhi nung mah se Karnataka-in ṭan phat aṭangin an kal fawr nghal a, chiang taka an chak avangin Mizoram chu Level 2-ah an awm chhunzawm zel ang. Karnataka hi Level 2-a group hmahruaitu dang pathum nen an inkhel kual leh ang a, team pali aṭanga a sang pahnihin Level 1 an kai ang.

Inelna hmachhawn zawng zawng tan ranking siam a ni dawn a, Mizoram pawhin khelh tur an la nei dawn a. Heta an ranking hi inelna an hmachhawn leh hun atan a pawimawh ang.