World Cup khel lo tur Joe Gomez

Liverpool defender Joe Gomez chu a ngalrek hliam zai a ni a, hei vang hian Champions League final leh World Cup-ah a hmel a lan thei dawn lo.

Kum 20 mi defender hi March thla khan England tan a feh chhuak a, Netherlands nena friendly match an khelhah a inhliam. Hliam a neih hnuah Liverpool tan April-ah match hnih khel leh tawh mah se a hliam zai a ni a, a inlan chhunzawm thei dawn ta lo a ni.

Joe Gomez chuan, "Hlawhtling takin ka ngalrek hliam chu zai a ni a, hei vanga club leh ram tana ka season tawp thu puan erawh a hrehawm takzet a ni," a ti.

Charlton player hlui hian tun season-ah Liverpool tan league match 23 a khel a, November 2017 khan England tana a match hmasa ber khelin Germany a hmachhawn.

Liverpool player zingah midfielder Alex Oxlade-Chamberlain chu hliam vangin tun season-ah a inlan tawh dawn lo bawk a, England international hian Champions League semifinal-a AS Roma nen an inkhelh ṭumin a khupah hliam a tuar a ni.