French Cup champion PSG

Paris Saint-Germain chuan Les Herbiers hnehin French Cup champion an ni a, Unai Emery-a'n Paris club tana a season hnuhnung berah Ligue 1, French Cup leh League Cup a chawi - Spanish manager hi a contract neih lai a zawh avangin season tawpah a chhuak dawn.

Thawhlehni zan inkhelah third division club Les Herbiers chu rinkai lo zawk ni mah se, a tir aṭanga a tawp thlengin huaisen takin an bei tluan. Mahse, an tan French champion PSG chu an ṭha lutuk deuh a, 2-0 a tlawmin an mumang ram aṭangin an harh chhuah a ngai ta a ni.

Paris St-Germain lamin inkhel thunun viauin a tir lamah vawi thum ngawt goal ban an tih per a, Giovani lo Celso-a'n chawlhlawk hmaa a goal khung chu second half minute 74-naah Edinson Cavani-a'n penalty aṭangin a chhunzawm leh a, an goal neih pakhat chu video assistant referee (VAR) hman a nih hnuah an pawm sak lo thung.

Zinkawng ngaihnawm
"Football-ah chuan thil thleng thei lo a awm lo, team ṭha pawh a hnuaihnung zawka ngaihte lakah an tlawm fo," tih a ni ṭhin a, a bik takin knock out tournament-ah phei chuan beisei loh result a thleng fo ṭhin. Kumin French Cup-a Les Herbiers kal chhoh dan pawh hi thawnthu ngaihnawm bikte zingah a tel.

Les Herbiers hi tun din­hmunah third division mawng­phah lamah an awm mek a, nomawi an inchuhpui PSG hi khawvela club hausa leh langsar berte zinga mi an ni thung - player manto ber Neymar lei thei an ni hial. Season khat budget atan Les Herbiers-in an hman zat chu pound maktaduai 1.77 a ni a, Brazail captain Neymar-a'n ni 16 chhunga a hlawh zat vel a ni.

Nikum October thla khan French Cup match hmasa an khel a, an inkhel entu mipui zat chu 217 chiah an ni! Mahse, PSG nen Stade de France-a final an inkhel entu erawh 73,772 zet an ni tawh thung.

France chhim lama khaw pakhat Les Herbiers beh­chhana club din hi an khaw innghahnaah hian mi 15,388 vel an chenga chhut a ni a, final en tur hian an fans 15,000 zetin ticket an lei - French league division sang pahnih hnuai lam aṭanga French Cup final khel thei pangana hi an khaw mipui zawngin an inkhel an en vek anga ngaih theih a ni!

PSG lakah chak lo chiang sa anga ngaih ni mah se, yard 20 aṭanga Sebastien Flocon pet chu Thiago Silva-a'n ṭha takin a dan sak a, Joachim Eickmayer-a'n box pawn aṭanga a pet ṭha tak chu goal ban hrulah a kal bawk. 2-0 a an hnufual hnuah pawh huaisen takin an bei let ngam a, a hmawr an bawk thei lo thung.

Kum 1919-a din tawh club hian an beisei French Cup an chawi thei ta lo a, hna an zo tihna a la ni lo. Zirtawpni zanah Beziers an tlawh dawn a, tun season an league match hnuhnung berah hian hnehna an chang zo lo a nih chuan third division aṭangin an tlahniam leh dawn a ni.

French Cup roreltu
Arab sumdawng hausa kuta an tlukluh hnuah Paris St-Germain-in French football an thunun a, a zawna a season li nan French Cup leh League Cup champion ni chungin kum tawp an hmang a, season hmasa lama Ligue 1 an chawi lo tih mai loh chu season li chhungin heng nomawi lian pathum hi vawi thum chu an chawi kawp vek thei a ni.

Paris club hian French Cup bikah 22 January 2014 aṭang khan hneh loh an la tawng lo, match 42 chhung zet chu hneh loh an tawng lo tawh a ni. Beisei phak baka khel ṭha Les Herbiers lakah inkhel thunun tluan chhuak vek bik lo mah se hnehna chan phu zawk an ni, an keeper Kevin Trapp-a'n hnathawh tur a nei meuh lo.

Barcelona forward hlui Ney­mar chu hliam vangin la chhawr thei lo mah se rawlthar duhawm Kylian Mbappe an nei. France international Mbappe hi striker Cavani nena inthlawpin an hlauhawm thei hle. Monaco aṭanga loan hmanga PSG pantu Mbappe-a'n a season khatnaah nomawi pathum a chawi nghal a ni.

PSG-in nomawi pathum chawi mah se an duh ber Cham­­pions League lamah beisei an phak lo. European football-a hlawhtlinpui thei tura an ngaih Emery chu UCL-ah ber a hlawhtlin theih miau loh avangin a contract an pawtsei dawn lo. Sevilla manager hlui kaihhruaina hnuaiah league match hnih chiah khelh tur an nei tawh.

Emery chuan, "Nomawi chawi tumin tha kan thawh a, a tawpah chuan kan hlawhtling leh ta. Season tluanin ka nauten goal khung tumin an bei ngawrh a, Champions League champion ni chiah lo mah ila kan khelh dan phungah lawmna tur a tam hle," a ti a, season thara a tih tur erawh a la sawi duh lo thung.